अधिष्ठाता डॉ. गिरीश ठाकूर यांचे प्रतिपादन
राष्ट्रीय मौखिक आरोग्य दिनानिमित्त विशेष उपक्रम
जळगाव (प्रतिनिधी) – तुम्हाला जर आजारांपासून मुक्तता हवी असेल तर तोंड व दात नेहमी स्वच्छ असले पाहिजे. गुटखा, तंबाखू सारखी व्यसने सोडली पाहिजेत. दोन वेळा ब्रश, जेवल्यावर गुळण्या करणे हे लक्षात ठेवले तर तुमचे दात आयुष्यभर सोबत देतील अशी माहिती शासकीय वैद्यकीय महाविद्यालयाचे अधिष्ठाता डॉ. गिरीश ठाकूर यांनी दिली. ते स्वच्छ मुख अभियान अंतर्गत राष्ट्रीय मौखिक आरोग्य दिनानिमित्त आयोजित उपक्रमात बोलत होते.
शासकीय वैद्यकीय महाविद्यालय व रुग्णालय, जळगाव येथे दंतशल्यचिकित्सा शास्त्र विभागात राष्ट्रीय मौखिक आरोग्य दिनानिमित्त कार्यक्रम आयोजित करण्यात आला होता. मंचावर अध्यक्षस्थानी अधिष्ठाता डॉ. गिरीश ठाकूर होते. तर प्रमुख पाहुणे म्हणून वैद्यकीय अधीक्षक डॉ. विजय गायकवाड, विभाग प्रमुख डॉ. प्रिया भुजे उपस्थित होते. प्रस्तावनेतून डॉ. सिद्धार्थ चौधरी यांनी कार्यक्रमाची माहिती दिली. सुरुवातीला मान्यवरांच्या हस्ते दीपप्रज्वलन करण्यात आले.
त्यानंतर “दातांचे आरोग्य” याविषयी डॉ. प्रिया भुजे यांनी उपस्थित रुग्ण व नातेवाईकांना मार्गदर्शन केले. दात कसे घासावे याचीही माहिती अनेकांना नसते. जेवल्यानंतर गुळण्या केल्या पाहिजेत. अन्यथा दातांची झीज होऊ शकते. हिरड्यांना त्रास होऊ शकतो. दातांच्या आरोग्याचे काही त्रास झाल्यास घरी उपचार न करता,रुग्णालयात तपासणीसाठी यावे, अशी माहिती डॉ. प्रिया भुजे यांनी दिली.
अधिष्ठाता डॉ. ठाकूर यांनी, दात व मुख स्वच्छ ठेवले तर निश्चितच मोठ्या आजारांपासून लांब ठेवतील. अगोदरच काळजी घ्या, नंतर उपचार घ्यायला लागतील, असे मार्गदर्शन केले. यावेळी स्त्रीरोग विभागाचे डॉ. संजय बनसोडे, औषधवैद्यक शास्त्र विभागाचे प्रा. डॉ. पाराजी बाचेवार, डॉ. मोनिका देसाई उपस्थित होते. सूत्रसंचालन डॉ. सिद्धार्थ चौधरी यांनी केले. आभार डॉ. सतीश सुरळकर यांनी मानले. कार्यक्रमासाठी तंत्रज्ञ सूर्यकांत विसावे, क्षितिज पवार, जनसंपर्क सहायक विश्वजीत चौधरी, प्रकाश पाटील आदींनी सहकार्य केले.
