किन्ही शिरपूर एमआयडीसीत ३० हजार लिटर संशयास्पद इंधन जप्त
‘नमो एनर्जी ऑईल’ कंपनीवर भुसावळ पोलिसांची धडक कारवाई; ३६ लाखांचा मुद्देमाल हस्तगत
भुसावळ (प्रतिनिधी) : भुसावळ तालुक्यातील किन्ही शिरपूर एमआयडीसी परिसरात सुरू असलेल्या संशयास्पद इंधन साठवणुकीबाबत मिळालेल्या गुप्त माहितीच्या आधारे भुसावळ तालुका पोलिस आणि पुरवठा विभागाने संयुक्तपणे कारवाई करत ‘नमो एनर्जी ऑईल’ या कंपनीच्या गोदामातून तब्बल ३० हजार लिटर डिझेल सदृश्य ज्वलनशील पदार्थ जप्त केला. या कारवाईत सुमारे ३६ लाख रुपयांचा मुद्देमाल हस्तगत करण्यात आला असून, या प्रकरणाचे धागेदोरे थेट गुजरात राज्याशी जोडले गेले असल्याचे प्रथमदर्शनी स्पष्ट झाले आहे.
याबाबत सविस्तर माहिती अशी की, रविवारी दि. १८ जानेवारी रोजी भुसावळ तालुका पोलिस ठाण्याचे निरीक्षक व स्थानिक गुन्हे शाखेला किन्ही एमआयडीसीतील प्लॉट क्रमांक एफ-५०/५१ वरील ‘नमो एनर्जी ऑईल’ कंपनीत संशयास्पद हालचाली सुरू असल्याची गुप्त खबर मिळाली. कंपनीच्या आवारात एका टँकरमध्ये डिझेलसारखा ज्वलनशील पदार्थ साठवण्यात आल्याची माहिती मिळताच पोलिस व पुरवठा यंत्रणा तत्काळ कामाला लागली.
तहसीलदारांच्या आदेशान्वये पुरवठा निरीक्षण अधिकारी रोशना रेवतकर, पोलिस उपनिरीक्षक पूजा अंधारे आणि त्यांच्या पथकाने पंचासमक्ष रविवारी दुपारी साडेअकराच्या सुमारास कंपनीच्या आवारात धाड टाकली. यावेळी जीजे-२४ व्ही-७६५५ (GJ 24 V 7655) क्रमांकाचा टँकर उभा असल्याचे आढळून आले. टँकरच्या कॉकमधून द्रव पदार्थ काढून पाहणी केली असता, त्याला डिझेलसारखा उग्र वास येत असल्याचे स्पष्ट झाले.
घटनास्थळी उपस्थित असलेले कंपनी मालकाचे भाऊ अमीन इक्बाल तेली (रा. सुरत) यांची चौकशी केली असता त्यांनी समाधानकारक माहिती न देता उडवाउडवीची उत्तरे दिली. हा टँकर ट्रान्सपोर्टचा असून भाडे करारावर आणल्याचे त्यांनी सांगितले; मात्र टँकरचा चालक घटनास्थळी अनुपस्थित होता. अधिकाऱ्यांनी जागेवरच इंधनाची घनता (डेनसिटी ७१२) व तापमान (२० अंश) मोजले. सदर पदार्थ बायोडिझेल की भेसळयुक्त डिझेल आहे, याची खात्री करण्यासाठी नमुने सीलबंद करून प्रयोगशाळेत (सी.ए.) तपासणीसाठी पाठवण्यात आले आहेत.
या कारवाईत सुमारे १५ लाख रुपये किमतीचा टँकर आणि २१ लाख रुपये किमतीचे ३० हजार लिटर इंधन (७० रुपये प्रति लिटर दराने) असा एकूण ३६ लाख रुपयांचा मुद्देमाल जप्त करण्यात आला आहे. जप्त टँकर पुढील तपासासाठी भुसावळ तालुका पोलिस ठाण्यात सुरक्षिततेसाठी हलवण्यात आला आहे.
दरम्यान, गुजरात कनेक्शन असलेल्या या कंपनीवर झालेल्या कारवाईमुळे जिल्ह्यातील भेसळखोर आणि ऑईल माफियांमध्ये खळबळ उडाली असून, कायदेशीर कारवाईच्या भीतीने व्यापारी वर्तुळात धास्तीचे वातावरण निर्माण झाले आहे.
ही संयुक्त कारवाई पुरवठा निरीक्षण अधिकारी रोशना रेवतकर, पोलिस उपनिरीक्षक पूजा अंधारे, उपनिरीक्षक रवी नरवडे, हवालदार उमाकांत पाटील, गोपाळ गव्हाणे, रतन परदेशी, विकास सातदिवे, राहुल वानखेडे तसेच भुसावळ तालुका पोलिस ठाण्याच्या पथकाने केली. पंच म्हणून तलाठी मनीषा बरडिया व प्रमोद ठोसर उपस्थित होते.
