जळगाव शहरात मेहरूण उद्यानात कारवाई
जळगाव (प्रतिनिधी) : शहरातील मेहरुण तलावाच्या परिसरात एमआयडीसी पोलिसांनी गांजाची वाहतूक करणाऱ्या एका इसमाला ताब्यात घेत अटक केली आहे. त्याच्याकडून साडेपाच किलो गांजा जप्त करण्यात आला आहे. याप्रकरणी एमआयडीसी पोलिस ठाण्यात गुन्हा दाखल करण्यात आला आहे.
मेहरुण तलाव परिसरातील जे.के. पार्क भागातील उद्यानात एक व्यक्ती गांजाची वाहतूक करत आहे, या माहितीच्या आधारे पोलिसांनी उद्यानात पाहणी केली असता, एक व्यक्ती मोटारसायकलवर गांजा घेऊन उभा असल्याचे दिसून आले. पोलिसांनी संशयित आरोपी मुकेश विष्णू अभंगे (वय ४२, रा. कंजरवाडा, जळगाव) याला ताब्यात घेतले. त्याच्याकडे एका मोठ्या पिशवीत साडेपाच किलो गांजा आढळून आला. पोलिसांनी घटनास्थळी फॉरेन्सिक विभागाला बोलावून नमुने तपासले. पोलिसांनी जप्त केलेल्या गांजाची अंदाजे किंमत ४० ते ५० हजार रुपये असल्याचे सांगितले आहे. या प्रकरणी एमआयडीसी पोलिस ठाण्यात गुन्हा दाखल करण्यात आला आहे.
सदरची कारवाई पोलीस निरीक्षक संदीप पाटील यांचे मार्गदर्शनाखाली पोउनि राहुल तायडे, चंद्रकांत धनके, पोहेकॉ दत्तात्रय बडगुजर, योगेश बारी, नितीन ठाकूर, राहुल घेटे, योगेश घुगे यांनी केली आहे. पुढील तपास सचिन नवले, चेतन पाटील करीत आहे.
