जळगाव ( प्रतिनिधी ) – तालुक्यातील म्हसावद फाट्याजवळ दुचाकीने जात असतांना रस्त्यात अचानक कुत्रा समोर आल्याने ब्रेक दाबल्यामुळे दुचाकी घसरून पडल्याने ३० वर्षीय महिला जागीच ठार झाल्याची घटना शनिवार ३० सप्टेंबर रोजी सायंकाळी ७ वाजेच्या सुमारास घडली आहे. याप्रकरणी पोलीसात नोंद करण्यात आलेली आहे .चित्राबाई शालीग्राम पाटील (३०, रा. ताडेपुरा, अमळनेर) असे मयत महिलेचे नाव आहे.
याबाबत सविस्तर वृत्त असे की, चित्राबाई शालीग्राम पाटील (३०, रा. ताडेपुरा, अमळनेर) या महिला आपल्या परिवारासह राहायला आहेत. शनिवारी ३० सप्टेंबर रोजी सायंकाळी ७ वाजेच्या सुमारास चित्राबाई पाटील ह्या मामेभाऊ व मुलांसोबत दुचाकीने एरंडेल कडून म्हसावद कडे येत असताना खेडी फाट्याजवळ दुचाकीच्या समोर अचानक कुत्रा समोर आला. त्यामुळे चालकाने अचानक ब्रेक दाबला. त्यात दुचाकी घसरल्याने चित्रबाई या खाली पडल्या. त्यांच्या डोक्याला गंभीर मार लागल्याने त्या जागीच ठार झाल्या. मयत महिलेच्या पश्चात एक मुलगा आणि एक मुलगी असा परिवार आहे. चित्राबाई यांचे पती शालीग्राम पाटील यांचे दोन महिन्यापुर्वीच निधन झाले होते. दोन महिल्यापुर्वीचे पितृछत्र हरविलेल्या दोन्ही मुलांचे आता मातृछत्रही हिरावले गेले आहे. याप्रकरणी पोलीस ठाण्यात नोंद करण्यात आलेली आहे. या घटनेमुळे परिसरात हळहळ व्यक्त केले जात आहे.
