रावेर तालुक्यातील खानापूर येथील घटना
रावेर (प्रतिनिधी) : दुचाकीला कट लागल्याच्या कारणावरून बसचालकाला खानापूर येथे मारहाण करण्यात आल्याची घटना शुक्रवारी दिनांक ५ जुलै रोजी दुपारी साडे १२ वाजेच्या सुमारास घडली. याप्रकरणी पोलिसात गुन्हा दाखल करण्यात यावा यासाठी चालक व वाहकांनी तासभर चक्काजाम आंदोलन केले होते
बसचालक सुधाकर पुंडलिक कोळी (४४, रा आंदलवाडी, ता. रावेर) असे जखमी चालकाचे नाव आहे. ते जळगाव – बऱ्हाणपूर बस (क्र. एमएच २०/बीएफ १६१४) रावेरकडून ब-हाणपूरकडे घेऊन जात होते. दरम्यान, खानापूर बसथांब्यावर एकाने बससमोर दुचाकी आडवी करून बस अडविली. दोन महिलांसह बस अडवणारे इसमाने बसचालकाला स्टेअरिंग आसनावरून खाली ओढत मोटारसायकलला कट का मारला याचा जाब विचारत बेदम मारहाण केली. यामुळे शहरात एकच गोंधळ उडाला.
जखमी चालकास रावेर ग्रामीण रुग्णालयात दाखल करण्यात आले. औषधोपचार करून पुढील उपचारासाठी शासकीय वैद्यकीय महाविद्यालय व रुग्णालयात हलविण्यात आले आहे. दरम्यान संशयित आरोपीला अटक करावी यासाठी चालक व वाहने काही काळ चक्काजाम आंदोलन केले होते. खानापूर दुरक्षेत्रातील पोलीस कर्मचारी घटनेची माहिती घेऊन पुढील कार्यवाही करीत होते.
