पारोळा बसस्थानकात घटना
पारोळा ( प्रतिनिधी ) – येथील बसस्थानकात एका महिलेची मंगल पोत चोरणाऱ्या चोरट्या महिलेला इतर महिलांनी रंगेहात पकडून बेदम चोप दिल्याची घटना घडली आहे. सुदैवाने पोलीस वेळेत हजर झाल्याने या महिलेचा पुढील मार वाचला.
लग्नाची बुधवारी मोठी तारीख असल्याने पारोळा शहराच्या बसस्थानकात प्रवाशांची प्रचंड गर्दी होती. या गर्दीचा फायदा घेण्यासाठी दोन ते तीन चोरट्या महिला बसस्थानकात दाखल झाल्या होत्या. फलाट क्रमांक ७ वर उभ्या असलेल्या बसमध्ये प्रवाशांची चढण्यासाठी मोठी गर्दी झाली होती. या गर्दीत चाळीसगाव तालुक्यातील खडकी येथील ललिता समाधान मुंगसे आणि अमळनेर तालुक्यातील नेरपाटी येथील मनीषा सुभाष पाटील या महिला बसमध्ये चढण्याचा प्रयत्न करत होत्या. याच वेळी एका ३० ते ३५ वर्षीय अनोळखी महिलेने ललिता मुंगसे यांच्या गळ्यातील मंगल पोत ओढली. ही बाब लक्षात येताच ललिता मुंगसे आणि तेथे उपस्थित असलेल्या इतर महिलांनी तातडीने त्या चोरट्या महिलेला पकडले आणि मारहाण सुरू केली.
घटनेची माहिती मिळताच बसस्थानकावरील पोलीस कर्मचारी तुषार सोनवणे, समाधान लोखंडे आणि होमगार्ड यांनी धाव घेतली. त्यांनी संतप्त महिलांच्या तावडीतून चोरट्या महिलेला बाहेर काढले आणि पोलीस ठाण्यात नेले. रात्री उशिरापर्यंत या प्रकरणाची पोलीस ठाण्यात नोंद करण्याचे काम सुरू होते. पोलिसांनी केलेल्या प्राथमिक चौकशीत या महिलेसोबत अजून एक ते दोन चोरटे साथीदार असल्याची माहिती समोर आली आहे. या घटनेमुळे बसस्थानकावरील प्रवाशांच्या सुरक्षिततेचा प्रश्न पुन्हा ऐरणीवर आला आहे.
