बुलढाणा जिल्ह्यातील मलकापूर तालुक्यातील घटना
मलकापूर (प्रतिनिधी) :- राष्ट्रीय महामार्ग क्रमांक ६ वरील चौपदरीकरणाच्या कामाकरिता असलेल्या रस्त्यालगत टीन शेडवर आयशर वाहनावरील नियंत्रण सुटून धडक देऊन भीषण अपघात झाला. यात ५ मजूर जागीच ठार झाले. तर ८ जण जखमी झाल्याची घटना आज सोमवारी पहाटे ५ वाजेदरम्यान वडनेर भोलजी नजिक असलेल्या उड्डाण पुलाजवळ घडली.
राष्ट्रीय महामार्ग क्रमांक ६ वरून खामगावकडे जाणारे आयशर (क्र. पी बी ११ सी झेड ४०७४) वाहनाच्या चालकाचे वाहनावरील नियंत्रण सुटून वडनेर भोलजी नजीक असलेल्या उड्डाणपुलाजवळ उभारलेल्या टीन शेड ला जबर धडक दिली. या धडकेत प्रकाश मकु धांडेकर (वय २६ वर्षे), पंकज तुळशीराम जांबेकर (वय १९ वर्षे), राजाराम दादू जांबेकर (वय ३५ वर्षे), अभिषेक रमेश जांबेकर (वय १८ वर्षे, सर्व रा. मोरगड ता. चिखलदरा, जि. अमरावती), गुणी भुया भोगर भुवा (रा. बोरोमतोली ता. गढ़वा) या पाच जणांचा मृत्यू झाला आहे.
तर दीपक पणजी बेलसरे, कमल रमेश जांभेकर, अमर बजू, शाम भास्कर सर्व. रा. मोरगड, अक्षय कुमार भैय्या (रा. चिनीया ता. गढ़वा), सतपाल कुमार मलिकचंद (रा. बोरी मातोली), महेश मोची (रा. बोरी मातोली जि. गढवा), आशिष कुमार, निर्मल भुयार (रा. बोरी मातोली) हे जखमी झालेले आहे. ५ मृत व ८ जखमी असे एकुण १३ आहेत. या अपघातातील जखमीवर मलकापूर येथील उपजिल्हा रुग्णालयात उपचार सुरू आहे. पुढील तपास पोलीस करीत आहे.
