एमआयडीसी पोलिसांचा तपास सुरु
जळगाव (प्रतिनिधी) : – शहरातील गुन्हेगारी वाढतच चालली आहे. एमआयडीसी पोलीस स्टेशनच्या हद्दीत ३ गावठी कट्टे आढळून आल्यावरही पुन्हा बंदुकीने गोळीबार करण्यात आल्याची घटना उघड झाली आहे. रेकॉर्डवरील गुन्हेगाराने एका १८ वर्षीय तरुणाच्या दिशेने जुन्या वादाच्या कारणातून गावठी कट्ट्याने फायरिंग करून प्राणघातक हल्ला केल्याची घटना शुक्रवारी दुपारी साडेतीन वाजेच्या सुमारास झाली आहे. याप्रकरणी पोलिसांनी तपासचक्रे फिरवून दोन संशयित आरोपींना अटक केली आहे.
सोहम गोपाळ ठाकरे (वय १८, रा. लक्ष्मीनगर, मेहरुण, जळगाव) हा त्यांच्या मित्रासह श्रीराम कन्याशाळा, मेहरुण जवळ उभा असताना दिक्षांत उर्फ दादू देवीदास सकपाळे (वय १९, रा. लक्ष्मीनगर, मेहरुण) व त्याचा मित्र गोपाळ सीताराम चौधरी (वय २०, रा.रेणुका नगर, मेहरुण) हे तेथे मोटारसायकलने आले होते. तसेच त्यांच्या सोबत दुस-या मोटारसायकलवर दोन अनोळखी तरुण आले होते. जुन्या वादाच्या कारणावरुन दिक्षांत सपकाळे व त्यांच्या सोबतच्या तरुणांनी सोहम यास शिवीगाळ केली. दिक्षांत याने सोहम यास, तुझा मुर्दा पाडतो असे बोलून त्याचा मित्र गोपाळ याने त्यांच्या कमरेला लावलेला गावठी कटटा दिक्षांत याच्याकडे दिला. दिक्षांत याने सोहम वर जिवे ठार मारण्याचे उददेशाने गावठी कट्याने फायरींग केली.
त्यावेळी सोहम ठाकरे हा सदर ठिकाणावरुन पळून गेला होता. गोंधळ घालणारे व त्याच्यासोबतचे मित्र मोटारसायकलने सदर ठिकाणावरुन पळून गेले. सोहम याच्यावर प्राणघातक हल्ला झाल्यांने त्यांने एमआयडीसी पोलीस स्टेशनला दिक्षांत सपकाळे व गोपाळ चौधरी तसेच दोन अनोळखी ईसामांविरुध्द खुनाचा प्रयत्न करणे या सदराखाली गुन्हा दाखल करण्यात आला होता. सदर गुन्हा गंभीर स्वरुपाचा असल्याने संशयित आरोपी पकडण्यासाठी पथकाचा शोध सुरु होता. यादरम्यान पोलीस निरिक्षक बबन आव्हाड यांना मिळालेल्या गोपनीय माहितीच्या आधारे गुन्हे शोध पथकाने दिक्षांत उर्फ दादू देवीदास सपकाळे व गोपाळ चौधरी यांना ताब्यात घेतले. त्यांच्यासोबत असलेले दोन साथीदार यांची नावे निष्पन्न करुन यांना देखील ताब्यात घेतले होते. त्यांची ओळख परेड बाकी आहे. दिक्षांत त्याच्यावर यापूर्वी ८ गुन्हे दाखल आहे.
सदरची कारवाई ही पोलीस अधिक्षक महेश्वर रेडडी, अपर पोलीस अधिक्षक अशोक नखाते, उपविभागीय पोलीस अधिकारी संदीप गावीत यांच्या मार्गदर्शनाखाली पोलीस निरिक्षक बबन आव्हाड, पोउनि/ दिपक जगदाळे, पोउनि / दत्तात्रय पोटे, पोहेकों/ किरण पाटील, पोहेकॉ/सचिन मुढे, पोहेकों/गणेश शिरसाळे, किशोर पाटील, योगेश बारी, छगन तायडे, किरण पाटील, ललीत नारखेडे अशांनी केली आहे. गुन्हयाचा पुढील सहाय्यक पोलीस निरिक्षक दयानंद सरवदे व पोकों/ निलेश पाटील करीत आहे.
