जळगावातील घटना
जळगाव (प्रतिनिधी) :- मोबाईल ॲपवर रिक्वेस्ट पाठवून ओळख निर्माण करीत वनरक्षक महिलेला एका इसमाने सुमारे ५ लाखात फसवणूक केल्याची घटना उघड झाली आहे. या प्रकरणी सायबर पोलिस ठाण्यात गुन्हा दाखल करण्यात आला आहे.
रोशनी सहदेव झटाले (वय ३३, चोपडा, जि. जळगाव) या महिलेने फिर्याद दिली आहे. डॉ. सनिष अमितव पेमा असे नाव सांगणाऱ्याने मोबाईल ॲपवर रिक्वेस्ट पाठवून ओळख निर्माण केली. महिलेसोबत चॅटिंग करीत त्यांचा विश्वास संपादन केला. त्यानंतर वेगवेगळे कारणं सांगत २६ जुलै ते १६ ऑक्टोबर २०२३ पर्यंत कल्पना कश्यम नावाच्या गाझियाबाद, उत्तरप्रदेशातील बँक खात्यावर एकूण चार लाख ८९ हजार रुपये ॲपद्वारे स्वीकारले. यात आर्थिक फसवणूक झाल्याचे लक्षात आल्यानंतर रोशनी झटाले यांनी सायबर पोलिस ठाण्यात फिर्याद दिली. त्यावरून डॉ. सनिष पेमाविरुद्ध गुन्हा दाखल करण्यात आला. पुढील तपास पोलिस निरीक्षक लीलाधर कानडे करीत आहेत.
