पाचोर्‍यातील दाखल फिर्यादीप्रकरणी पोलिसांची धडक कारवाई
पाचोरा ( प्रतिनिधी ) – शहरातील एका फिर्यादी महिलेच्या बैंक खात्यातून तब्बल ३ लाख १९ हजार ५१६ रुपये अवैधरित्या काढून घेण्यात आले होते. या प्रकरणी पाचोरा पोलिसांनी तांत्रिक तपास व कौशल्याचा वापर करून आरोपीला नागपूर येथून दोन वर्षांनी अटक केली आहे.
याबाबत पाचोरा पोलीस स्टेशनमध्ये स्वीटी योगेश संघवी (वय ३८, रा. उत्राण, ता. एरंडोल, ह.मु. संघवी कॉलनी, पाचोरा) यांच्या फिर्यादीवरून गुन्हा दाखल करण्यात आला होता. या गुन्ह्याचा तपास करताना पोलीस कॉन्स्टेबल शरद पाटील यांनी आपले कौशल्य वापरले. तांत्रिक बाबींचा आधार घेत आरोपीचा शोध घेण्यात आला. पोलीस निरीक्षक राहुलकुमार पवार यांच्या मार्गदर्शनाखाली तसेच उपनिरीक्षक कैलास ठाकूर यांच्या मदतीने आरोपी विशाल दीपक गायकवाड यास नागपूर येथून अटक करण्यात आली आहे.
नागरिकांनी आपल्या बँक खात्याशी जोडलेले मोबाईल नंबर आणि गोपनीय माहिती याबाबत सतर्क राहण्याचे आवाहन पोलिसांनी केले आहे. फिर्यादी स्वीटी संघवी यांचा एच.डी.एफ.सी. बँकेचा खाते क्रमांक २१३६१०००००२५३८ होता, ज्याला त्यांचा मोबाईल नंबर ७८८८२१३२३८ लिंक होता. हा मोबाईल नंबर नंतर मोबाईल कंपनीने आरोपी विशाल दीपक गायकवाड (वय २५. रा. फ्लॅट नंबर ७०२, सातवा मजला, अमर पॅलेस, धंतोली, नागपूर) याला दिला होता. फिर्यादीचे बँकेचे चेक बुक व एटीएम कार्ड कुरिअर कंपनीकडून डिलीव्हरीसाठी आले असताना, कुरिअर कंपनीने या नंबरवर फोन केला.
आरोपी विशाल गायकवाड याने खोटे बोलून हे पार्सल नागपूर येथील त्याच्या घराच्या पत्त्यावर मागवले. पार्सल स्वीकारल्यानंतर आरोपीने त्यातील एटीएम कार्डचा पिन सेट केला. त्यानंतर २१ मार्च २०२३ ते २४ मार्च २०२३ या कालावधीत वेगवेगळ्या ठिकाणाहून फिर्यादीच्या बँक खात्यातून अवैधरित्या एकूण रु. ३,१९,५१६ रुपये काढून फसवणूक केली आहे. या घटनेबाबत २०२३ मध्ये गुन्हा दाखल करण्यात आला होता.
