पालघर जिल्ह्यातील पतीसह पाच जणांविरुद्ध जळगावमध्ये गुन्हा दाखल
जळगाव (प्रतिनिधी) : विवाह नोंदणी साइटवरून घटस्फोटित महिलांची माहिती घेत त्यांच्याशी लग्न करून पैसे उकळणाऱ्या पतीचा भंडाफोड झाला आहे. एक पत्नी जिवंत असताना त्याने जळगावातील एका घटस्फोटित महिलेशी लग्न केले व तिची सहा लाखांत फसवणूक केली. यापूर्वीही त्याने इतर चार जणींशी लग्न केल्याचेही समोर आले आहे. याप्रकरणी पालघर जिल्ह्यातील ओव्हळ येथील पंकज रमेश पाटील याच्यासह पाच जणांविरुद्ध जळगाव शहर पोलिस ठाण्यात गुन्हा दाखल करण्यात आला आहे.
विवाह नोंदणी साइटवरून घटस्फोटीत महिलांची माहिती घेत पंकज रमेश पाटील, त्याची आई रंजना रमेश पाटील, रमेश माधव पाटील या तिघांसह अन्य दोन अशा एकूण पाच जणांनी जळगावातील एका ३७ वर्षीय महिलेची माहिती घेतली. (केसीएन)या महिलेशी आपुलकी दाखवून मुलांनाही सांभाळण्याचे आश्वासन देत पंकज पाटील याने या महिलेशी लग्न केले. त्यानंतर या महिलेची सहा लाख रुपयांमध्ये फसवणूक करीत तिचा छळ करणे सुरू केले. त्यानंतर ही महिला जळगावात निघून आली.
पंकज पाटील याने जळगावातील महिलेशी लग्न केल्यानंतर तिला समजले की, त्याची एक पत्नी जिवंत असताना इतर चार महिलांशीही त्याने लग्न केले आहे. त्या नोकरी करणाऱ्या असून त्यांचे पैसे तो वापरत असे. असाच प्रकार या महिलेसोबतही झाल्याने तिने जळगाव शहर पोलिस ठाण्यात फिर्याद दिली. त्यावरून वरील पाच जणांविरुद्ध बीएनएस कलम ८२ (१), ८२(२), ८५, ३१८(२), ३१८(४), १५५(२) नुसार गुन्हा दाखल करण्यात आला आहे. पुढील तपास सपोनि कल्याणी वर्मा करीत आहेत.
================
