जळगाव तालुक्यातील जळके येथील घटना
जळगाव ( प्रतिनिधी ) – तालुक्यातील वावडदा येथील महावितरण सबस्टेशन अंतर्गत येणाऱ्या जळके गावात वीज मीटर तपासणीसाठी गेलेल्या महावितरण कंपनीच्या पथकाला एका ग्राहकाने धक्काबुक्की करत शिवीगाळ केली. तसेच जीवे मारण्याची धमकी देऊन वीज मीटरची तोडफोड केली आणि ११ केव्ही उच्च दाबाचा वीजपुरवठा खंडित करण्याचा प्रयत्न केल्याची धक्कादायक घटना सोमवारी ४ ऑगस्ट रोजी दुपारी ४.३० वाजेच्या सुमारास घडली आहे. या प्रकरणी मंगळवारी ५ ऑगस्ट रोजी दुपारी एमआयडीसी पोलीस ठाण्यात संबंधित वीज ग्राहकावर गुन्हा दाखल करण्यात आला आहे.
जळके गावातील एका ग्राहकाने जास्त वीज बिल येत असल्याची तक्रार वावडदा येथील सबस्टेशनला केली होती. या तक्रारीची पडताळणी करण्यासाठी महावितरण कंपनीचे पथक सोमवारी ४ ऑगस्ट रोजी दुपारी ४.३० वाजता ग्राहकाच्या मीटरची तपासणी करण्यासाठी जळके गावात गेले होते. त्यावेळी जास्त बिल आल्याच्या रागातून संबंधित वीज ग्राहकाने महावितरणच्या पथकाला धक्काबुक्की करण्यास सुरुवात केली आणि शिवीगाळ केली. या दरम्यान, संतप्त ग्राहकाने नुकतेच बसवलेले डीओडी वीज मीटरची तोडफोड करून नुकसान केले.
इतकेच नाही तर, त्याने ११ केव्हीच्या उच्च दाबाच्या विद्युत पुरवठ्याच्या लाईनवर लोखंडी सळई फेकून मारत वीजपुरवठा खंडित करण्याचा प्रयत्न केला. परिस्थितीचे गांभीर्य लक्षात घेऊन महावितरण कंपनीने या परिसरात सुमारे एक तास विद्युत पुरवठा खंडित केला होता. या घटनेमुळे महावितरण कर्मचाऱ्यांमध्ये भीतीचे वातावरण निर्माण झाले आहे. या संदर्भात मंगळवारी ५ ऑगस्ट रोजी दुपारी १२ वाजता एमआयडीसी पोलीस ठाण्यात फिर्याद देण्यात आली असून, त्यानुसार गुन्हा दाखल करण्यात आला आहे.
