रावेर तालुक्यातील पाल येथे कारवाई
रावेर (प्रतिनिधी) :- मध्यप्रदेशातून पाल मार्गे महाराष्ट्रात गावठी पिस्तूल घेऊन येणाऱ्या यावल तालुक्यातील वढोदा येथील तरुणांस पोलिसांनी अटक केली असून त्याच्याकडून १० हजार रुपये किमतीचा गावठी कट्टा जप्त करण्यात आला आहे.
मध्यप्रदेशातून एक व्यक्ती गावठी पिस्तूल घेऊन पाल मार्गे महाराष्ट्रात येत असल्याची गुप्त माहिती पोलीस निरीक्षक डॉ. विशाल जयस्वाल यांना मिळाली. (केसीएन)त्यांनी उप निरीक्षक तुषार पाटील, गुन्हे शोध पथकाचे पोलीस कर्मचारी समाधान ठाकूर, सचिन घुगे, प्रमोद पाटील, विकार शेख यांना पाल जवळील शेरी नाका येथे नाकाबंदी सुरु असलेल्या ठिकाणी पाठवले. शुक्रवारी मध्यरात्री पावणे चार वाजेच्या सुमारास एक व्यक्ती संशयस्पद स्थितीत फिरताना आढळून आला.
त्याची अंगझडती घेतली असता १० हजार रुपये किमतीचे गावठी पिस्तूल मिळून आले. हे पिस्तूल पोलिसांनी जप्त केले असून संशयित आरोपी भरत गणेश सोनवणे (वय ३२, रा. वढोदा ता. यावल) याला अटक करण्यात आली आहे. त्याच्याकडून १० हजार रुपयांचा मुद्देमाल जप्त करण्यात आला आहे.
