जळगाव जवळच्या अजिंठा लेणीतील प्रकार
सोयगाव (वार्ताहर) : जळगाव येथून जवळ असलेल्या सोयगाव तालुक्यातील जगप्रसिद्ध अजिंठा लेणीत आग्या मोहळाच्या मधमाश्यांनी दि. ५ एप्रिलला कर्नाटकमधील शालेय विद्यार्थ्यांवर हल्ला केल्याची घटना ताजी असतानाच मंगळवारी २२ एप्रिल रोजी सायंकाळी पाचच्या सुमारास थायलंडमधील ४० पर्यटकांच्या समूहावर लेणी क्रमांक २६ समोर हल्ला चढविला. यात एक विदेशी महिला पर्यटक गंभीर जखमी झाल्याची घटना समोर आली आहे.
लेणी क्रमांक २६ समोरील आग्या मोहळाच्या मधमाशांनी मंगळवारी सायंकाळी थायलंड येथील पर्यटकांवर अचानक हल्ला चढवला. जीव वाचविण्याच्या आकांताने आरडा ओरड करत उपस्थित सर्व पर्यटक सैरावैरा पळू लागले. भारतीय पुरातत्व विभागाच्या कर्मचाऱ्यांनी मधमाश्यापासून बचाव करण्यासाठी प्रयत्न केले. मात्र तोपर्यंत थायलंड येथील एका महिला पर्यटकावर मधमाशांनी चावा घेत गंभीर जखमी केले. यात ही महिला बेशुद्ध अवस्थेत पडली होती. जखमी महिलेला अजिंठा येथील शासकीय रुग्णालयात पुढील उपचारासाठी पाठवण्यात आले. या घटनेमुळे खळबळ उडाली असून शासनाची उदासीनता समोर आली आहे.
