पारोळा तालुक्यातील म्हसवे रस्त्यावरील घटना
पारोळा (प्रतिनिधी) :- येथील राष्ट्रीय महामार्गावर मध्यप्रदेश येथील रहिवासी व सध्या मजुरीसाठी वास्तव्यास असलेल्या शेतमजुरास लक्झरी बसने जोरदार धडक दिल्याने झालेल्या अपघातात मजुराचा मृत्यू झाल्याची घटना रविवारी सायंकाळच्या सुमारास घडली.
याबाबत पारोळा पोलिसात टंटिया पटेल यांनी फिर्याद दिली आहे. कुटुंबाचा उदरनिर्वाह करण्यासाठी मध्यप्रदेश येथून मजुरी कामासाठी म्हसवे येथे काही लोक आले आहेत. शहरात बाजार करण्यासाठी धरमसिंग धनसिंग पटेल (३५) हे गेले होते. दरम्यान, शहरातून झोपडीकडे परत पायी येत असताना पारोळ्याकडून जळगावकडे जाणारी लक्झरी बस (एमएच४३/एच८१९९) ने धरमसिंग पटेल यांना पाठीमागून जोरदार धडक दिल्याने झालेल्या अपघातात त्यांना जोरदार दुखापत झाली. त्यामुळे त्यांचा जागीच मृत्यू झाला.
याबाबत पारोळा पोलिसात लक्झरी बस चालकाविरुद्ध गुन्हा दाखल करण्यात आला असून तपास हवालदार डॉ. शरद पाटील करीत आहेत.
