यावल तालुक्यातील फैजपूर येथील घटना
यावल (प्रतिनिधी) : पाण्याच्या शोधात शहरात शिरलेल्या हरिणाला कुत्र्यांनी लचके तोडत ठार केल्याची घटना शनिवारी सकाळी फैजपूर येथील धनाजी नाना महाविद्यालयाच्या आवारात उघडकीस आली. वनविभागाच्या पथकाने घटनास्थळी येत मृत हरणाचा पंचनामा केला. घटनास्थळाचा पंचनामा करून या हरणाचे शवविच्छेदन केल्यानंतर त्याच्यावर अंत्यसंस्कार करण्यात आले.
फैजपूर ते सावदा रस्त्यावरील धनाजी नाना महाविद्यालयाच्या आवारात शुक्रवारी सकाळी हरीण मृत अवस्थेत आढळून आले. या हरणाच्या मागे भटक्या कुत्र्यांचे टोळके लागले होते. या कुत्र्यांनी थेट हरीणचा लचका तोडला आणि त्यात या मादी हरीणचा मृत्यू झाला, अशी माहिती प्रत्यक्षदर्शीनी दिली. या घटनेची माहिती तातडीने यावल पूर्व वनविभागाचे वन परिक्षेत्र अधिकारी स्वप्निल फटांगरे यांना देण्यात आली. त्यांनी वनपाल सतीश वाघमारे आणि त्यांचे पथक घटनास्थळी पाठवले.
