धरणगाव तालुक्यातील घटनेने जळगाव जिल्हा हादरला
जळगाव (प्रतिनिधी) : १४ वर्षांपूर्वी वडिलांची हत्या झाली. या हत्या प्रकरणात असणाऱ्या संशयित आरोपींची निर्दोष मुक्तता झाली. यामुळे मुलाने थेट गोळीबार करून घटनेतील संशयित आरोपीला माग ठेवून संपविल्याचे फिर्यादीतून दिसून आले आहे. याप्रकरणी धरणगाव पोलीस स्टेशनला गुन्हा दाखल झाला असून तरुणाला अटक करण्यात आली आहे.
गोपाळ सोमा मालचे (वय ४०, रा. वाकटुकी ता.धरणगाव) असे मयत व्यक्तीचे नाव आहे. तो चाळीसगाव तालुक्यात कळमडू गावात परिवारासह राहत होता. दरम्यान त्यांचे भाऊ विनोद सोमा मालचे (वय ४१) यांनी फिर्याद दिली आहे.(केसीएन)सन २०११ साली मालचे परिवार आणि कोळी परिवारात दंगा झाला होता.त्यात ज्ञानेश्वर शंकर कोळी याचा मारहाणीत जखमी होऊन मृत्यू झाला होता. यात गोपाळ मालचे, विनोद मालचे यांचेसह काही जणांना अटक झाली होती. पुढे या प्रकरणात मालचे परिवाराची निर्दोष मुक्तता झाली होती. ज्ञानेश्वर कोळी याला मालचे यांनी मारले आहे म्हणून त्यांचा मुलगा राहुल ज्ञानेश्वर कोळी याचे मनात राग होता. त्यामुळे मालचे परिवार हे चाळीसगाव तालुक्यात कळमडू येथे राहण्यास गेले होते.
मात्र त्यांची शेती वाकटुकी गावात असल्यामुळे त्याचे येणे जाणे होते. तर शेतीकामानिमित्त आता धरणगाव शहरात १ महिन्यापासून घर भाड्याने घेऊन गोपाल मालचे हे राहत होते. दि. २२ एप्रिल रोजी रात्री साड़ेसात वाजेच्या सुमारास पत्नी माया यांना गोपाल यांनी फोन केला.(केसीएन)मी विहीर फाट्याजवळ उभा आहे. येथे राहुल ज्ञानेश्वर कोळी, गोलू नामदेव कोळी, दीपक नामदेव कोळी, गोपाल गजानन कोळी, गोकुळ गजानन कोळी, नामदेव शंकर कोळी असे उभे आहेत. त्यांच्या पत्नीने त्यांना, तेथे थांबू नका. निघून जा. तर मी खामखेडा जात असल्याचे गोपाल यांनी पत्नीला सांगितले. काही वेळाने फोन केल्यावर, गोपाल हे जखमी अवस्थेत असल्याची माहिती पत्नी माया यांना मिळाली. यानंतर खुनाची घटना उघडकीस आली आहे.
त्यानुसार, राहुल कोळी याने गोपाल मालचे यांना मागील प्रकरणात निर्दोष सुटल्याचा राग मनात ठेऊन विहीर फाट्याजवळ एकटा असल्याची संधी साधून गावठी कट्याने गोळ्या झाडून ठार मारल्याप्रकरणी धरणगाव पोलीस स्टेशनला गुन्हा दाखल झाला आहे. दरम्यान, गोपाल मालचे यांचा मृतदेह जळगावात शासकीय वैद्यकीय महाविद्यालयात शवविच्छेदन करून नातेवाईकांच्या ताब्यात देण्याचे काम सुरु होते.गोपाल मालचे यांना नाकाजवळ डाव्या बाजूला व कपाळाला डोक्याच्या मधोमध गोळी लागल्याने मृत्यू झाल्याचे दिसून आले आहे. तर राहुल कोळी याला न्यायालयात हजर केले जाणार आहे.
