भुसावळ शहरातील घटना
भुसावळ (प्रतिनिधी) : येथील रेकॉर्डवरील गुन्हेगार निखिल राजपूत याची मध्यरात्री दीड वाजेच्या सुमारास अज्ञात इसमाने धारदार शस्त्राचे वार करून भीषण हत्या केल्याचे उघड झाले आहे. दरम्यान या प्रकरणी भुसावळ बाजारपेठ पोलीस स्टेशनला खुनाचा गुन्हा दाखल करण्याची प्रक्रिया सुरू होती. दरम्यान शुक्रवारीच भुसावळचे पोलीस त्याला अटक करण्यासाठी फैजपूरला गेले असता त्याने पोलिसांवर हल्ला करून पळ काढला होता.
पोलिसांच्या रेकॉर्डवरील कुविख्यात गुन्हेगार म्हणून निखील राजपूतची ख्याती होती. शिवाय यापूर्वी त्याच्यावर हद्दपारीची कारवाईदेखील करण्यात आली होती. पोलिसांच्या अंगावर हात टाकण्यासह धमकी देणे, खंडणी वसुल करणे, मारहाण करणे यासह गंभीर गुन्ह्यात निखील राजपूत हा प्रमुख संशयित आरोपी होती. शहरातील श्रीराम नगराजवळील पाण्याच्या टाकीजवळ त्याचे वास्तव्य होते. शुक्रवारी रात्री निखील हा घरी आल्यानंतर काही संशयितासोबत पाण्याच्या टाकीच्या टेरेसवर झोपला असता त्याचा वाद झाला. वादातून त्याच्या गळ्यावर चाकूचे सपासप वार करीत खून करण्यात आल्याची घटना समोर आली. एका संशयिताचे नाव निष्पन्न झाले असून कौटूंबिक वादातून त्याने हा खून केल्याची माहिती समोर आली आहे.
विशेष म्हणजे २४ तासांपूर्वीच निखीलसह त्याच्या सहकार्‍यांनी बाजारपेठ पोलिसांवर हल्ला केल्याप्रकरणी गुन्हा दाखल झाला होता. भुसावळ बाजारपेठ पोलीस स्टेशनला दाखल गुन्ह्यातील फरार आरोपी हा फैजपूर हद्दीतील महेंद्र ढाबा येथे येत असल्यांची गोपनीय बातमी पोलीस अधिकारी यांना मिळाली होती. त्यानुसार पोलीस पथक आरोपीला ताब्यात घेण्यासाठी घटनास्थळी रवाना झाले होते. संशयित आरोपीला महेंद्र ढाबा जवळ रोडवर सापळा रचून ताब्यात घेत असतांना पोकॉ.प्रशांत सोनार यांना (ता. १) सप्टेंबर रोजी रात्री १२ वाजून २० मिनिटांनी निखिल राजपूत याने फायटरने उजव्या डोळ्या खाली मारून धक्का – बुक्की केली. तसेच हल्ला करून डिझायर गाडीतून पळून गेले. म्हणून फैजपूर पोलीस स्टेशनला संशयित आरोपी निखिल राजपूत,अनिषा उर्फे मोही रितेश रतनानी सोबत तीन अनोळखी इसमांविरुध्द पोकॉ.प्रशांत सोनार (नेमणूक बाजारपेठ पोलीस स्टेशन) यांनी दिलेल्या फिर्यादीवरून फैजपूर पोलीस स्टेशनला गुन्हा दाखल करण्यात आला होता .या गुन्ह्याचा अधिक तपास पीएसआय लोखंडे करीत आहे.
दरम्यान भुसावळ मध्ये मध्यरात्री निखिल राजपूतचा खून झाल्यानंतर जळगाव पोलीस उपअधीक्षक संदीप गावीत, एलसीबी पोलीस निरीक्षक किसनराव नजन-पाटील, भुसावळ शहरचे पोलीस निरीक्षक गजानन पडघण व बाजारपेठचे पोलीस निरीक्षक बबन आव्हाड यांच्यासह पोलीस कर्मचार्‍यांनी घटनास्थळी धाव घेत पाहणी केली. श्रीराम नगर भागातील पाण्याच्या टाकीवर रक्ताच्या थारोळ्यात निखील राजपूतचा मृतदेह आढळला असून तो शवविच्छेदनासाठी पाठवण्यात आला आहे. भुसावळ बाजारपेठ पोलीस स्टेशनला गुन्हा दाखल करण्याची प्रक्रिया सुरू होती.
