अल्पवयीन आरोपी स्वतःहून पोलीस ठाण्यात हजर
चोपडा (प्रतिनिधी ) – प्रेमसंबंधाच्या कारणातून एका अल्पवयीन मुलाने पिस्तुलातून गोळी झाडून तरुणाचा खून केला तर तरुणीचा गळा दाबून तिलाही ठार मारून स्वतःहून अल्पवयीन आरोपी चोपडा पोलीस ठाण्यात हजर होऊन त्याने या हत्याकांडाची कबुली दिली आहे. या दुहेरी हत्याकांडाने चोपड्यासह जिल्हा हादरला असून पोलीस अधिक तपास करीत आहे. वर्षा समाधान कोळी (वय २०, रा.सुंदरगगढी, चोपडा) आणि राकेश संजय राजपूत (वय, २२, रा. रामपूर
चोपडा) अशी मयत युगालाची नाव आहेत. दरम्यान याप्रकरणी पोलिसांनी दोन जणांना ताब्यात घेतले असून इतर दोन जणांचा पोलीस शोध घेत आहे.
याबाबत सूत्रांनी दिलेली माहिती अशी कि, एका अल्पवयीन भावाने बहिणीचे एका तरुणावर प्रेम असल्याने याचा त्याच्या मनामध्ये राग असल्याने त्याने राकेश संजय राजपूत (वय, २२, रा. रामपूर चोपडा) याची एका पिस्तुलाद्वारे गोळी झाडून हत्या केली तर बहिणीचा गळा दाबून खून केला. त्यानंतर अल्पवयीन आरोपी हा पिस्तुलासह स्वतःहून चोपडा शहर पोलीस ठाण्यात रात्री साडेदहा वाजेच्या सुमारास हजर होत त्याने या हत्याकांडाची माहिती पोलिसांना दिली . त्याच्या या माहितीने पोलिसही चक्रावले . दरम्यान आरोपीने दोघांचा खून चोपडा लगत जुना वराड रोड शिवारात केल्याची माहिती दिल्यानंतर पोलिसांनी घटनास्थळी जाऊन पाहणी केली. एका नाल्यात दोघांचे मृतदेह आढळून आले.
वर्षा हिला पळवून नेण्याच्या उद्देशाने राकेश हा शुक्रवारी रात्री तिच्या घरी आला होता. त्यास चार आरोपींनी शिवीगाळ करून मारहाण केली आणि शहरानजीक नाल्याजवळ नेले. तिथे त्याचा कपाळात गावठी कट्ट्याने गोळ्या घालून तर बहिणीचा रुमालाने गळा दाबून खून करण्यात आला. तुषार कोळी (रा. माचला ता. चोपडा), भरत संजय रायसिंग (रा. चोपडा), निलेश कोळी अशी इतर आरोपींची नावे आहेत.पोलिसांनी दोन संशयित अल्पवयीन आरोपींना ताब्यात घेण्यात आले असून इतर दोघांचा शोध सुरु आहे. प्रेम संबंधातून खून झाल्याची माहिती समोर आली असून या प्रकरणी मयत मुलीचा अल्पवयीन भाऊच फिर्यादी झाला असल्याची माहिती पोलिसांनी दिली आहे. पुढील तपास सहा. पोलीस अधीक्षक रावले हे करीत आहेत.
