पारोळा शहरात मदत मिळण्यासाठी जमावाचा ठिय्या
पारोळा (प्रतिनिधी) : तालुक्यातील म्हसवे विभागात महावितरण कंपनीसाठी कंत्राटी पद्धतीने काम करणाऱ्या वायरमनचा विजेचा धक्का लागून जागीच अपघाती मृत्यू झाला. यानंतर संतप्त झालेल्या जमावाने ठिय्या आंदोलन केले.
दिनेश शामकांत भामरे (३२, रा. म्हसवे ता.पारोळा) असे मयत व्यक्तीचे नाव आहे. दिनेशचे वडील पेट्रोलपंपाच्या टँकरवर कामाला असून तो एकुलता एक मुलगा होता. त्याला एक बहीण आहे. तसेच त्याच्या पश्चात साडेतीन वर्षांची मुलगी व दीड वर्षाचा मुलगा, पत्नी असा परिवार आहे.(केसीएन)शनिवारी दिनांक ६ जुलै रोजी सायंकाळी ६ वाजेच्या सुमारास म्हसवे ते नगाव रस्त्यावरील वीजपुरवठा खंडित झाल्याने ती दुरुस्त करण्यासाठी कंत्राटी वायरमन दिनेश भामरे हा पोलवर चढला असताना अचानक विजेचा प्रवाह सुरू झाला.
त्याला प्रचंड विजेचा धक्का बसला आणि तो तिथेच पोलवर चिकटला. त्याला त्याचे काका सुनील बाबूलाल भामरे यांनी म्हसवे परिसरातील गावकऱ्यांच्या मदतीने खाली उतरून वैद्यकीय उपचारासाठी कुटीर रुग्णालय पारोळा येथे आणले असता, वैद्यकीय अधिकाऱ्यांनी त्यास मृत घोषित केले. घरातील कर्ता मुलगा अचानक गेल्यामुळे संपूर्ण कुटुंबाला धक्का बसला असून त्यांनी आक्रोश केला.
मयत दिनेश भामरे हा कंत्राटी वायरमन म्हणून असल्याने महावितरण कंपनी त्यास मोबदला देण्यास असमर्थ आहे, असे निदर्शनास आल्यावर त्याचे नातेवाईक आणि मित्रमंडळींनी अमळनेर रस्त्यावरील ३३ केव्ही महावितरण कंपनीच्या कार्यालयासमोर रविवारी दि. ७ ला सकाळी १० वाजेपासून साडेअकरापर्यंत रास्ता रोको करून ठिय्या आंदोलन केले.
महावितरण अधिकारी आणि पोलिस अधिकारी यांनी जमावाला समजावण्याचा प्रयत्न केला. जमाव काहीएक ऐकून घ्यायला तयार नव्हता.(केसीएन)अशा परिस्थितीत जिल्हा बँकेचे उपाध्यक्ष अमोल पाटील यांनी घटनास्थळी जाऊन जमावाला शांत केले. दिनेशच्या कुटुंबीयांना मुख्यमंत्री सहायता निधीमधून मदत आपण मिळवून देऊ, असे आश्वासन दिले. त्यानंतर जमावाने आंदोलन मागे घेतले.
