अक्कलकुव्याच्या व्यापाऱ्यावर गुन्हा दाखल
जामनेर (प्रतिनिधी) : जळगाव वनविभाग अधिकाऱ्यांनी जळगाव तालुक्यातील कुसुंबा शिवारात धाड टाकून खैर प्रजातीचे लाकूड एकूण ६८० नग किंमत अंदाजे १ लाख ७५ हजार रुपये असलेले जप्त केले आहे. याप्रकरणी नंदुरबार जिल्ह्यातील अक्कलकुवा येथील व्यापाऱ्यांचा असल्याचे स्पष्ट झाल्याने त्याच्यावर गुन्हा दाखल करण्यात आला आहे.
विभागीय वनाधिकारी दक्षता यांना प्राप्त झालेल्या गुप्त बातमीनुसार दि. २३ रोजी वनपरिक्षेत्र अधिकारी गस्तीपथक, जळगाव आणि वनपरिक्षेत्र अधिकारी प्रादेशिक, जळगाव यांच्यासह गस्तीपथक व रेंज स्टाफने जळगाव शहर नजीक कुसुंबा शिवार येथे धाड टाकली. सदरच्या जागेवर खैर प्रजातीचा लाकूड माल एकूण नग ६८० हस्तगत करण्यात आले. त्याची किंमत अंदाजे १ लाख ७५ हजार इतकी आहे. सदरचा अवैध खैर साठा हा अक्कलकुवा जि. नंदुरबार येथील खैर व्यापारी हसरत खान साहेब खान कुरेशी उर्फ बाबा कुरेशी यांचा असल्याचे स्पष्ट झाले. त्यांच्याविरुद्ध भारतीय वन अधिनियम तसेच महाराष्ट्र वन नियमावलीच्या विविध कलमान्वये गुन्हा नोंद करण्यात आलेला आहे.
सदरची कारवाई निनू सोमराज, वनसंरक्षक धुळे, विभागीय वन अधिकारी दक्षता राजेंद्र सदगीर, सहाय्यक वनसंरक्षक उमेश बिराजदार यांच्या मार्गदर्शनाखाली सचिन जाधव, वनपरिक्षेत्र अधिकारी, गस्तीपथक, जळगाव, ,नितीन बोरकर, वनपरिक्षेत्र अधिकारी, वनपाल संदीप पाटील, योगेश दीक्षित, भरत पवार, भागवत तेली, दीपक पाटील, हरीश थोरात, अजय रायसिंग, विलास पाटील, गुलाब सिंह ठाकरे वनरक्षक यांच्या मदतीने करण्यात आली.
