माजी मंत्री एकनाथ खडसे आक्रमक, पोलीस निरीक्षकाच्या उद्दामपणाची दिली माहिती
जळगाव विशेष प्रतिनिधी : शासकीय मालमत्तेची चोरी रोखण्यात पोलीस प्रशासन अपयशी ठरत असल्याचा आरोप करत, जाब विचारण्यासाठी गेलेल्या राष्ट्रवादी काँग्रेस (शरद पवार गट) पक्षाचे नेते आणि माजी मंत्री एकनाथराव खडसे यांच्यावर सावदा पोलीस ठाण्यात गुन्हा दाखल करण्यात आला आहे. “मी कायदेशीर लढाई लढण्यास तयार आहे, पण अडीच महिने झाले तरी मुरूम चोरांवर कारवाई का झाली नाही?” असा सवाल खडसे यांनी उपस्थित केला आहे. तसेच सावदा पोलीस ठाण्याच्या निरीक्षकांचा उद्दामपणा त्यांनी पत्रकारांचे समोर मांडला.
सुमारे अडीच महिन्यांपूर्वी ४० ते ५० हजार ब्रास मुरूम चोरी झाल्याची तक्रार पुराव्यासह एका व्यक्तीने केली होती. मात्र, सावदा पोलिसांनी ही तक्रार महसूल विभागाकडे वर्ग केली. डिसेंबरमध्ये विधानसभेत हा प्रश्न उपस्थित केल्याने पोलीस निरीक्षकाला संताप झाल्याचा दावा खडसे यांनी केला आहे. अखेर इरिगेशन विभागाने तक्रार दिल्यानंतर एफआयआर दाखल झाला, पण तपासाच्या नावाखाली टोलवाटोलवी सुरूच होती.
अडीच महिने उलटूनही कारवाई का झाली नाही, याचा जाब विचारण्यासाठी खडसे पोलीस स्टेशनला गेले असता पोलीस निरीक्षक विशाल पाटील यांनी “मी माझ्या पद्धतीने कितीही वेळ चौकशी करेन, मला तुमचे बंधन आहे का” असे उत्तर दिले. या वादादरम्यान संवादात काही अपशब्द वापरले गेल्याने खडसे यांनी माफीही मागितली. मात्र, सावदा पोलीस ठाण्याच्या परिसरात चालणाऱ्या अवैध धंद्यांवरून खडसे यांनी लाचलुचपत प्रतिबंधक विभागाकडे तक्रार करण्याची भूमिका घेताच, त्यांच्यावर गुन्हा दाखल करण्यात आला.
एकीकडे सहाय्यक पोलीस निरीक्षक म्हणतात की आम्ही 29 जानेवारी 2026 रोजी एका फिर्यादी ने दिलेल्या तक्रारीनुसार गुन्हा दाखल केलेला आहे .सदर या गुन्ह्यात अज्ञात आरोपी आहे. याचा शोध घेणे सुरू आहे. असे प्रभारी अधिकारी विशाल पाटील यांनी केसरीराजशी बोलताना सांगितले. आता हे प्रकरण येणाऱ्या अधिवेशनात गाजणार आहे. असे जाणकारांचे मत आहे.
“शासनाचा मुरूम चोरीला गेला, संबंधित व्यक्तीने व्हिडिओ व ऑडिओ त्याचे पुरावे दिले, तरीही पोलीस कारवाई करत नाहीत. उलट भ्रष्टाचार आणि अवैध धंद्यांवर बोललो तर माझ्यावर गुन्हा दाखल केला जातो. मी या अन्यायाविरुद्ध आणि मुरूम चोरीच्या प्रकरणाचा वरिष्ठ पातळीवर पाठपुरावा सुरूच ठेवणार आहे.”
- आ. एकनाथराव खडसे, विधान परिषद.
