एरंडोल तालुक्यातील पिंपळकोठाजवळ अपघात
जळगाव (प्रतिनिधी) : कॉंग्रेसचे ज्येष्ठ नेते तथा वरिष्ठ पत्रकार मुफ्ती हारून नदवी यांच्या कारचा सोमवारी दि. २७ मे रोजी सकाळी भीषण अपघात झाला. या अपघातात चालक व मुलाला जबर मार लागला आहे. हा अपघात एरंडोल तालुक्यातील पिंपळकोठा गावाजवळ राष्ट्रीय महामार्गावर झाला.
कारचे टायर अचानक फुटल्याने वाहनाने चार-पाच कोलांट्या घेतल्या. यात कारच्या छताचे नुकसान होऊन आत बसलेल्या मुफ्ती हारून नदवी, त्यांचे कुटुंबिय आणि चालकाला मार लागला. मुफ्ती नदवी आणि त्यांच्या कुटुंबियांना किरकोळ दुखापत झाली असून त्यांच्यावर खासगी रूग्णालयात उपचार सुरू आहेत. दरम्यान, अपघाताची माहिती मिळताच त्यांच्या नागरिकांनी तात्काळ रूग्णालयाकडे धाव घेतली. याबाबत पोलीस तपास करीत आहे.
