जळगाव शहरातील घटना
जळगाव ( प्रतिनिधी ) – ८ दिवसांपूर्वीच जिल्हा कारागृहामध्ये आलेल्या सोहम गोपाल ठाकरे (वय २०) या बंदयाला झोपेतून उठवून २ बंद्यांनी बरॅकच्या दरवाजावर आदळत मारहाण केली. ही घटना २७ सप्टेंबर रोजी जिल्हा कारागृहात घडली. या प्रकरणी कुणाल गोपाल चौधरी व अजय मोरे या दोन बंद्यांविरुद्ध जिल्हापेठ पोलिस ठाण्यात गुन्हा दाखल करण्यात आला आहे.
बंद्याला मारहाण होऊन रक्त येत असताना घटनेच्या दहा मिनिटांनंतर कर्मचारी तेथे आला. एमआयडीसी पोलिस ठाण्यात दाखल एका गुन्ह्यातील सोहम ठाकरे याला २० सप्टेंबर रोजी जिल्हा कारागृहातील बरॅक क्रमांक १३ मध्ये तीन क्रमांकाच्या सर्कलमध्ये ठेवण्यात आले. २७ सप्टेंबर रोजी सकाळी तो झोपलेला असताना तेथे कुणाल चौधरी हा आला व पायाने धक्का देत उठविले व बाहेर ये, मला तुझ्याशी काम असल्याचे सांगू लागला. सोहम उठताच त्याला मारहाण सुरू केली. तसेच अजय मोरे याने पकडून ठेवले व कुणालने बरॅकवर डोके आपटून सोहमला दुखापत केली. त्यामुळे त्याच्या कपाळ, नाकातून रक्त येऊ लागले. त्या वेळी इतरांनी तरुणाची सुटका केली. या घटनेमुळे एकच खळबळ उडाली असून जिल्हा कारागृहातील सुरक्षा पुन्हा एकदा ऐरणीवर आली आहे.
