पाचोरा तालुक्यात सातगाव डोगरी येथे घटना
पाचोरा (प्रतिनिधी) :- तालुक्यातील सातगाव डोगरी येथे एका कापड दुकानाला मध्यरात्री अचानक आग लागल्याची दुर्दैवी घटना घडली आहे. या आगीत दुकानातील साड्या, ड्रेस मटेरियल, रेडीमेड कपडे आणि महत्त्वाची कागदपत्रे पूर्णपणे जळून खाक झाली असून दुकानदाराचे मोठे आर्थिक नुकसान झाले आहे.
सातगाव डोगरी येथील रहिवासी राजेंद्र भिला पाटील (वय ५८) यांचे त्यांच्या राहत्या घराला लागूनच ‘जोगेश्वरी कापड दुकान’ नावाचे दुकान आहे. १२ फेब्रुवारी २०२६ च्या मध्यरात्री २:३० ते ३:०० वाजेच्या सुमारास या दुकानाला अचानक आग लागली. पहाटेच्या वेळी आग लागल्याने कोणाच्याही लक्षात येण्यापूर्वीच आगीने रौद्र रूप धारण केले होते. या आगीत दुकानातील विविध प्रकारच्या साड्या आणि पातळ शुटिंग-शर्टिंगचे कापड, रेडीमेड कपडे आणि रुमालांचे गठ्ठे, दुकानाची महत्त्वाची कागदपत्रे हे सर्व साहित्य आगीच्या भक्ष्यस्थानी पडले असून सर्व वस्तू जळून कोळसा झाल्या आहेत.
या घटनेबाबत राजेंद्र पाटील यांनी पिंपळगाव हरेश्वर पोलीस ठाण्यात खबर दिली. त्यानुसार १३ फेब्रुवारी २०२६ रोजी दुपारी १२:१५ वाजता ‘अकस्मात आग’ म्हणून या घटनेची नोंद करण्यात आली आहे. सदर घटनेचा तपास पिंपळगाव हरेश्वर पोलीस ठाण्याच्या सहाय्यक पोलीस निरीक्षक कल्याणी वर्मा यांच्या मार्गदर्शनाखाली सफौ हिरालाल पाटील हे करत आहेत. आगीचे नेमके कारण अद्याप समजू शकलेले नाही, मात्र शॉर्ट सर्किटमुळे आग लागली असावी असा प्राथमिक अंदाज वर्तवण्यात येत आहे.
