ट्रॅक्टर-ट्रॉलीसह ४.०३ लाखांचा मुद्देमाल जप्त; जळगाव तालुका पोलिसांची धडक कारवाई
जळगाव (प्रतिनिधी) :- कानळदा गावालगत असलेल्या महर्षी कण्व आश्रमाजवळ अवैधरित्या वाळू वाहतूक करणाऱ्या ट्रॅक्टर-ट्रॉलीवर जळगाव तालुका पोलिसांनी कारवाई करत ४ लाख ३ हजार रुपयांचा मुद्देमाल जप्त केला. या प्रकरणी संबंधित वाहनचालकाविरुद्ध चोरी व गौण खनिज नियमांचे उल्लंघन केल्याप्रकरणी गुन्हा दाखल करण्यात आला आहे.
पोलिसांनी दिलेल्या माहितीनुसार, २९ मे २०२६ रोजी 1.30 वाजेच्या सुमारास कानळदा गावाजवळील महर्षी कण्व आश्रम परिसरातील कच्च्या रस्त्यावर ही कारवाई करण्यात आली. पोलिसांना मिळालेल्या माहितीच्या आधारे पथकाने छापा टाकला असता, कोणत्याही शासकीय परवानगीशिवाय ट्रॅक्टर-ट्रॉलीद्वारे वाळूची वाहतूक केली जात असल्याचे आढळून आले.
कारवाईदरम्यान पोलिसांनी अंदाजे एक ब्रास वाळू, तिची किंमत सुमारे ३ हजार रुपये, तसेच स्वराज ७४४ एफई कंपनीचा ट्रॅक्टर आणि ट्रॉली असा एकूण ४ लाख ३ हजार रुपयांचा मुद्देमाल जप्त केला. जप्त करण्यात आलेल्या ट्रॅक्टरचा क्रमांक एमएच-१९ सीझेड-६७०७ असल्याचे पोलिसांनी सांगितले.
या प्रकरणी कानळदा येथील रहिवासी जयेश पांडुरंग ठाकरे (वय २४) याच्याविरुद्ध भारतीय न्याय संहिता २०२३ मधील कलम ३०३(२) तसेच गौण खनिज विकास व विनियमन अधिनियम आणि महाराष्ट्र जमीन महसूल अधिनियमातील संबंधित कलमान्वये गुन्हा दाखल करण्यात आला आहे.
पोलीस निरीक्षक शशिकांत पाटील यांच्या मार्गदर्शनाखाली ही कारवाई करण्यात आली. प्रकरणाचा पुढील तपास पोलीस कर्मचारी प्रवीण पाटील करीत असून, अवैध वाळू उपसा व वाहतुकीविरोधात अशाच प्रकारच्या कारवाया पुढेही सुरू राहणार असल्याचे पोलिसांनी स्पष्ट केले आहे.
