भुसावळ शहरातील घटना
भुसावळ (प्रतिनिधी) : शहरातील गडकरी नगरात सुरू असलेल्या अमृत योजनेच्या माध्यमातून बांधण्यात येत असलेल्या जलकुंभावर काम करीत असलेल्या ५० वर्षीय मजुराचा जलकुंभावरून खाली पडून मृत्यू झाला. ही घटना शनिवारी दि. ११ मे रोजी सकाळी ११ वाजता घडली. याप्रकरणी बाजारपेठ पोलिसात अकस्मात मृत्यूची नोंद करण्यात आली.
वसंत चावदस मोरे (वय ५०, रा. कासवा ता. भुसावळ) असे मयत मजुराचे नाव आहे. मोरे यांच्या पश्चात पत्नी, मुलगा, दोन मुली असा परिवार आहे. शहरातील गडकरी नगरात अमृत योजनेच्या माध्यमातून जलकुंभाचे बांधकाम सुरू आहे. ते दररोज अप-डाऊन करीत काम करीत होते. शनिवारी सुध्दा ते कामावर सकाळीच ९ वाजता आले होते. शनिवारी या जलकुंभावर वसंत मोरे हे काम करीत असतांना खाली पडले.
यावेळी त्यांना सुरक्षेचे काहीही कवच नव्हते. डोक्यात हेल्मेट नाही, संरक्षण पट्टा नाही, सुमारे ७० फुटापेक्षा जास्त उंच असलेल्या या जलकुंभावरून मोरे खाली पडून त्यांचा मृत्यू झाला. कुटुंबियांना माहिती मिळताच त्यांनी एकच आक्रोश केला. जलकुंभाच्या स्लॅबचे काम करीत असतांना ही घटना घडली. याप्रकरणी बाजारपेठ पोलिसात अकस्मात मृत्यूची नोंद करण्यात आली.
