जळगाव ( प्रतिनिधी ) – लाच मागितल्याच्या तक्रारींची दखल घेत कारवाई व गुन्हे दाखल करण्यात लाचलुचपत प्रतिबंधक विभागाच्या पुणे परीक्षेत्राने राज्यात अव्वल स्थान पटकावले आहे, नाशिक परिक्षेत्राने दुसरे स्थान पटकावले आहे. नाशिक परिक्षेत्रात अहमदनगर प्रथम क्रमांकावर तर जळगाव युनिट दुसऱ्या क्रमांकावर आहे.
लाचलुचपत प्रतिबंधक विभागातर्फे देण्यात आलेल्या माहितीनुसार 29 डिसेंबर 2021 अखेर सापळा रचून केलेल्या कारवाई स्वरूपात तसेच अपसंपदा व अन्य भ्रष्टाचाराचे महाराष्ट्रात 754 गुन्हे दाखल झाले. लाचलुचपत प्रतिबंधक विभागाच्या पुणे परिक्षेत्राने सर्वाधिक म्हणजे 162 गुन्हे दाखल केले. गुन्हे दाखल करण्यात व चालू वर्षाषाअखेरच्या कामगिरीत या परीक्षेत्राचा प्रथम क्रमांक लागला आहे. नाशिक परिक्षेत्राने चालू वर्षाअखेर 127 गुन्हे दाखल करून दुसरा क्रमांक पटकावला. मागील वर्षात दाखल झालेल्या गुन्ह्यांपेक्षा या वर्षातील गुन्हे 29 ने जास्त आहेत.
नाशिक परिक्षेत्रातील जळगाव युनिटने सरत्या वर्षाअखेरपर्यंत 33 गुन्हे दाखल केले. मागील वर्षापेक्षा जास्तीचे 13 गुन्हे दाखल करण्याची कामगिरी करीत दुसरा क्रमांक पटकावला आहे. लाचलुचपत प्रतिबंधक विभागाचे अधीक्षक कडासने, जळगाव युनिटचे उपाधिक्षक एस.एस.पाटील यांच्यासह त्यांच्या सहकाऱ्यांचे अभिनंदन केले जात आहे. अहमदनगर युनिटने नासिक परिक्षेत्रात प्रथम क्रमांक पटकावला आहे. नगर युनिटनेही 29 डिसेंबर 2021 अखेर पर्यंत 33 गुन्हे नोंदवले आहेत.
