चौघांविरुद्ध रामानंदनगर पोलीस ठाण्यात गुन्हा दाखल
जळगाव ( प्रतिनिधी ) – शहरातील पिंप्राळा परिसरातील प्रशांत पाटील चौकात एका २१ वर्षीय तरुणाला काहीही कारण नसताना चौघांनी संगनमत करून लाठ्या-काठ्यांनी आणि लाथाबुक्क्यांनी बेदम मारहाण केल्याची घटना घडली आहे. याप्रकरणी रामानंदनगर पोलीस ठाण्यात चौघांविरुद्ध भारतीय न्याय संहितेच्या विविध कलमान्वये गुन्हा दाखल करण्यात आला आहे.
फिर्यादी शोभाबाई गजानन सपकाळे (वय ३९, रा. प्रबुद्ध नगर, पिंप्राळा) यांचा मुलगा शुभम गजानन सपकाळे हा १ जानेवारी २०२६ रोजी रात्री १०:३० वाजेच्या सुमारास प्रशांत पाटील चौकातील ऋषिकेश कोळी यांच्या घरासमोरील सार्वजनिक रस्त्यावरून जात होता. यावेळी संशयित आरोपींनी त्याला अडवून वाद घालण्यास सुरुवात केली. या वादाचे रूपांतर हाणामारीत झाले. संशयित आरोपी विशाल भिका सोनवणे (कोळी), चंद्रकांत उर्फ बाळा शांताराम कोळी, यश प्रदीप पाटील उर्फ बोंड्या आणि धीरज कोळी (सर्व राहणार पिंप्राळा, जळगाव) यांनी संगनमत करून शुभमला लाथाबुक्क्यांनी मारहाण केली.
संशयित आरोपी विशाल कोळी याने हातातील लाकडी काठीने शुभमच्या डाव्या हातावर आणि पाठीवर जबर प्रहार करून त्याला जखमी केले. मारहाण केल्यानंतर आरोपींनी शिवीगाळ करत शुभमला ‘जीवे मारण्याची धमकी’ देखील दिली. या घटनेनंतर जखमी शुभमच्या आईने रामानंदनगर पोलीस ठाण्यात धाव घेऊन तक्रार नोंदवली. पोलिसांनी याप्रकरणी गुन्हा दाखल केला आहे. या प्रकरणाचा पुढील तपास पोलीस निरीक्षक राजेंद्र गुंजाळ यांच्या मार्गदर्शनाखाली पोलीस हेकाँ. योगेश माळी करत आहेत. अद्याप या प्रकरणात कोणालाही अटक करण्यात आलेली नाही.
