भामट्याविरुद्ध गुन्हा दाखल
जळगाव(प्रतिनिधी):- शहरातील फुले मार्केटमधील एका ऑनलाईन परफ्युम विक्री करणाऱ्या व्यावसायिकाची फसवणूक झाल्याचा प्रकार समोर आला आहे. बनावट नावे आणि ई-मेल आयडीचा वापर करून सुमारे १ लाख २१ हजार २८३ रुपयांची आर्थिक फसवणूक केल्याप्रकरणी जळगाव शहर पोलीस ठाण्यात गुन्हा दाखल करण्यात आला आहे.
विशाल विनोद जवाहरानी (वय २६, रा. आदर्श नगर, जळगाव) यांचा फुले मार्केटमधील ‘परफ्युम्स बाय जनता शॉपी’ येथे परफ्युम विक्रीचा व्यवसाय आहे. त्यांच्या www.perfumesbyis.com या वेबसाईटवरून रवी कुमार नावाच्या एका व्यक्तीने वेळोवेळी वेगवेगळ्या नावाने आणि मोबाईल क्रमांकाचा वापर करून परफ्युमची ऑनलाईन ऑर्डर दिली होती.
संबंधित संशयित आरोपीने ‘रेझर पे’ (Razorpay) द्वारे ऑर्डरचे पेमेंट केले होते. जवाहरानी यांनी सदर ऑर्डर डीटीडीसी (DTDC) कुरियरद्वारे पाठवून दिली, जी आरोपीने वेगवेगळ्या ठिकाणी स्वतः ताब्यात घेतली. मात्र, माल मिळाल्यानंतर संशयिताने संबंधित बँकेकडे या पेमेंटबाबत तक्रार केली. परिणामी, बँकेने ती रक्कम व्यावसायिकाला न पाठवता ‘होल्ड’वर ठेवली. अशा प्रकारे मालही मिळवला आणि पैसेही अडकवून ठेवून फिर्यादीची १ लाख २१ हजार २८३ रुपयांची फसवणूक केली.
या प्रकरणी विशाल जवाहरानी यांनी दिलेल्या फिर्यादीवरून जळगाव शहर पोलीस ठाण्यात रवी कुमार (पूर्ण नाव पत्ता माहित नाही) याच्याविरुद्ध गुन्हा दाखल करण्यात आला आहे.पुढील तपास पोलीस निरीक्षक सागर शिंपी यांच्या मार्गदर्शनाखाली पोलीस कर्मचारी करत आहेत.
