दुकानातील पिशवीतून १२ हजार ५०० रुपये चोरीला
दि. २६ ऑगस्ट २०२६ रोजी दुपारी ३ ते ४.३० वाजेच्या दरम्यान शाहूनगर परिसरातील शाहरू कॉम्प्लेक्स येथे फिर्यादी अनिल राजमल कासट (वय ६२) यांच्या पँटच्या खिशातील १२ हजार ५०० रुपये रोख रक्कम अज्ञात चोरट्यांनी लंपास केली होती. याप्रकरणी जळगाव शहर पोलीस ठाण्यात CCTNS गुन्हा क्र. ३३५/२०२६, भारतीय न्याय संहिता कलम ३०३(२) अन्वये गुन्हा दाखल करण्यात आला.
गुप्त माहिती व सीसीटीव्हीच्या आधारे आरोपींचा शोध
गुन्ह्याचे गांभीर्य लक्षात घेऊन पोलीस अधीक्षक श्रीकांत धिवरे यांनी जळगाव शहर पोलीस ठाण्याचे प्रभारी पोलीस निरीक्षक सागर शिंपी यांना तातडीने तपासाच्या सूचना दिल्या. त्यानुसार गुन्हे शोध पथकाने गुप्त बातमीदारांकडून माहिती मिळवून तसेच सीसीटीव्ही फुटेजचे तांत्रिक विश्लेषण करत आरोपींचा माग काढला.
दोघांना अटक; अल्पवयीन संशयिताचाही सहभाग
तपासादरम्यान चोरीच्या गुन्ह्यात (१) शहीदखान नजीरखान (वय २७), रा. युसूफ मेडिकलजवळ, गेंदालाल मिल, जळगाव आणि (२) समीर खान मजीदखान (वय ३७), रा. बी. नं. ११, घर नं. १५, गेंदालाल मिल, जळगाव यांचा सहभाग निष्पन्न झाला. तसेच एका विधी संघर्षित बालकाचा सहभाग असल्याची माहिती पोलिसांना मिळाली.
गुन्हे शोध पथकाने संशयितांना ताब्यात घेऊन कौशल्यपूर्ण चौकशी केली असता त्यांनी चोरीच्या गुन्ह्याची कबुली दिल्याचे पोलिसांनी सांगितले. त्यानंतर दोन्ही प्रौढ आरोपींना अटक करण्यात आली असून विधी संघर्षित बालकास कायदेशीर प्रक्रियेनुसार ताब्यात घेण्यात आले आहे.
१२ हजार रुपयांची रोकड हस्तगत
आरोपींकडून १२ हजार रुपये रोख रक्कम हस्तगत करण्यात आली आहे. त्यामुळे चोरीचा गुन्हा दाखल झाल्यानंतर अवघ्या पाच तासांच्या आत पोलिसांनी गुन्ह्याचा छडा लावून मुद्देमाल हस्तगत केला.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, जळगाव उपविभागाचे उपविभागीय पोलीस अधिकारी नितीन गणापुरे यांच्या मार्गदर्शनाखाली पोलीस निरीक्षक सागर शिंपी यांच्या नेतृत्वाखाली GPSI सुनील पाटील, सय्यद/दिपक शिरसाठ, पोहेकॉ/नंदलाल पाटील, पोहेकॉ/भगवान पाटील, पोहेकॉ/उमेश भांडारकर, पोहेकॉ/सतीश पाटील, पोहेकॉ/विरेंद्र शिंदे, पोहेकॉ/योगेश पाटील, पोकॉ/अमोल ठाकूर, पोकॉ/राहुलकुमार पांचाळ, पोकॉ/प्रणय पवार व पोकॉ/भगवान मोरे यांच्या पथकाने केली.
