‘लाईनमन डे’ निमित्त मुख्य अभियंता मुलाणी यांच्या अपेक्षा
जळगाव (प्रतिनिधी) : वीज यंत्रणेवर काम करणाऱ्या प्रत्येक जनमित्रांने सुरक्षा साधनांचा जबाबदारीपूर्वक वापर केल्यास निश्चितपणे जळगाव परिमंडल विद्युत अपघातशून्य होईल, अशी अपेक्षा व्यक्त करुन नवतंत्रज्ञानाच्या माध्यमातून जनमित्रांसाठी येणारा काळ नवीन संधी घेऊन येईल, अशा शुभेच्छा मुख्य अभियंता आय.ए.मुलाणी यांनी दिल्या. परिमंडल कार्यालयात “प्रकाशदीप” सभागृहात मंगळवारी ‘लाईनमन – डे’ उत्साहाने साजरा झाला. त्यावेळी ते बोलत होते.
‘लाईनमन – डे’ निमित्त जळगाव परिमंडल कार्यालयात आयोजित कार्यक्रमास अधीक्षक अभियंता अनिल महाजन, योगा शिक्षीका डॉ. अनिता पाटील, गणी मेमन, सहव्यवस्थापक अशोक केदारे यांच्यासह सर्व अधिकारी-कर्मचारी मोठ्या संख्येने उपस्थित होते. कार्यक्रमास लाईनमन व महिला जनमित्र मोठ्या संख्येने उपस्थित होते. सदर कार्याक्रमात गनी मेमन यांनी सर्व उपस्थित जनमित्रांना मानसिक आरोग्य व कौटूंबिक स्वास्थ बद्दल मार्गदर्शन केले. तसेच अनिता पाटील यांनी योगा, प्राणायाम व शारिरीक आरोग्य यावर मार्गदर्शन केले.
प्रारंभी दीप प्रज्वलनाने कार्यक्रमाची सुरुवात झाली. कार्यक्रमादरम्यान विविध वीज कामगार संघटनांचे पदाधिकारी, महिला व पुरुष जनमित्रांनी आपले अनुभव कथन करुन ‘लाईनमन – डे’ साजरा करीत असल्याबद्दल महावितरण प्रशासनाचे व शासनाचे आभार मानले. या प्रसंगी बोलताना मुख्य अभियंता जळगाव परिमंडल मुलाणी यांनी जनमित्रांना वीज ग्राहकासोबत सौजन्याने वागुन उत्तम व दर्जेदार सेवा देऊन दैनंदिन जिवनास विशेस समाधान प्राप्त करण्याची संधी महावितरणमध्ये आहे. जळगाव परिमंडलातील जळगावसह धुळे आणि नंदुरबार जिल्ह्यातील प्रत्येक मंडल आणि विभागीय कार्यालय स्तरावरही, मंगळवारी ‘लाईनमन – डे’ साजरा करण्यात आला. विविध ठिकाणी झालेल्या कार्यक्रमात चांगली कामगिरी करणाऱ्या पुरुष आणि महिला लाईनमनचा प्रातिनिधीक स्वरुपात सत्कारही करण्यात आला. प्रत्येक ठिकाणी कार्यक्रमात सुरक्षा साधनांचे महत्त्व सांगून सुरक्षा साधनांचा वापर करण्यासंबंधी शपथही देण्यात आली.
