सोमवारी पहाटेच्या सुमारास घटना उघडकीस
जळगाव (प्रतिनिधी) : शहरातील नाथवाडा परिसरात सिंधी कॉलनी रस्त्यावर एका तरुणाचा गळा चिरून खून करण्यात आल्याची धक्कादायक घटना सोमवारी दि. ३ जुन रोजी पहाटेच्या सुमारास उघडकीस आली आहे. घटनास्थळी एमआयडीसी पोलिसांनी धाव घेत तपास सुरु केला आहे. याप्रमाणे एका संशयिताला ताब्यात घेण्यात आल्याची माहिती मिळाली आहे.
शहरातील ललित प्रल्हाद वाणी (वय-४५, रा. नाथ जळगाव) असे मयत कामगाराचे नाव आहे. ते सुप्रीम कंपनी, गाडेगाव येथे कामाला आहेत. ललित वाणी यांच्या पश्चात आई, वडील, पत्नी, २ मुले असा परिवार आहे. रात्री १२ वाजेच्या सुमारास कामावरून ते कामावरील दुसरी शिफ्ट आटोपून घरी येत असताना सिंधी कॉलनी ते नाथवाडा रस्त्यावर अज्ञात व्यक्तीने त्यांच्या गळ्यावर कुठल्यातरी कारणाने धारदार शस्त्राने वार करून त्यांचा निर्घूण खून केला.
सोमवारी पहाटेच्या सुमारास मुख्य चौकात बांधकाम सुरू असलेल्या इमारतीच्या बाहेर वाळूवर त्यांचा मृतदेह मिळून आला. घटनेची माहिती मिळताच एमआयडीसी पोलीस ठाण्याचे निरीक्षक बबन आव्हाड यांच्यासह पथकाने धाव घेतली. अज्ञात इसमानी त्यांच्या गळ्यावर वार केल्याने त्यांचा मृत्यू झाला आहे. दरम्यान, उपविभागीय पोलीस अधिकारी संदीप गावीत हे घटनास्थळी पोहचले असून फॉरेन्सिक टीम नमुने घेत आहे.
मयताची बॅग रस्त्याच्या कडेला मिळून आली आहे. एमआयडीसी पोलीस स्टेशनला गुन्हा दाखल करण्याची प्रक्रिया सुरू आहे. दरम्यान कंजरवाडा येथून एका संशयित इसमाला पोलिसांनी ताब्यात घेतल्याची माहिती मिळत आहे.
