महापौर दीपमाला काळे यांचे युद्धपातळीवर काम करण्याचे निर्देश
जळगाव (प्रतिनिधी):- शहराच्या आरोग्याच्या दृष्टीने अत्यंत महत्त्वाच्या असलेल्या आव्हाणे शिवारातील घनकचरा डंपिंग ग्राऊंडच्या समस्यांबाबत महापौर दीपमाला काळे यांच्या अध्यक्षतेखाली विशेष बैठक पार पडली. या बैठकीत कचरा फॅक्टरी येथील कंपाऊंड वॉल, रॅम्प आणि रस्त्यांच्या कामाचा सविस्तर आढावा घेण्यात आला. प्रशासकीय दिरंगाई आणि तांत्रिक त्रुटींमुळे रखडलेली ही कामे तात्काळ सुरू करण्याचे आदेश महापौरांनी दिले आहेत.
शहरातील कचऱ्याची शास्त्रोक्त पद्धतीने विल्हेवाट न लागल्यामुळे आणि उघड्यावरील कचऱ्यामुळे नागरिकांच्या तक्रारी वाढल्या आहेत. या पार्श्वभूमीवर आयोजित बैठकीत श्री श्री इन्फ्राचे मक्तेदार यांनी कामातील अडचणी मांडल्या. सुमारे ८५,००० स्क्वेअर फूट जागेवर ६ मीटरपर्यंत कचरा साचलेला असून, जमीन उंच-सखल असल्याने जोपर्यंत हा कचरा बाजूला करून जमिनीची पातळी समतल केली जात नाही, तोपर्यंत संरक्षक भिंत (कंपाऊंड वॉल) आणि रॅम्पचे काम करणे तांत्रिकदृष्ट्या अशक्य असल्याचे त्यांनी सांगितले.
महत्वाच्या बाबी
सुधारित अंदाजपत्रक : शहर अभियंता योगेश बोरोले यांनी माहिती दिली की, मूळ अंदाजपत्रकात खोदकाम आणि कचरा वाहतुकीचा समावेश नाही. मात्र, निविदा रक्कम कमी असल्याने शिल्लक निधीतून वाढीव कामाचा प्रस्ताव उद्यापर्यंत तयार केला जाईल.
बायोमायनिंगला गती : आयुक्त ज्ञानेश्वर ढेरे यांनी पुढील २५ दिवसांत बायोमायनिंगचे काम पूर्ण करण्याचे आणि मनपाच्या पोकलॅन्डद्वारे कामाच्या जागेवरील कचरा बाजूला करून देण्याचे निर्देश दिले.
काम पूर्ण करण्याची हमी : जर मनपाने जागा समतल करून दिली, तर पुढील ३ महिन्यांत सर्व कामे पूर्ण करण्याची हमी मक्तेदार यांनी दिली.
कंपाऊंड वॉल प्राधान्याने : महापौरांनी स्पष्ट केले की, सुरक्षा आणि दुर्गंधी रोखण्यासाठी प्रथम कंपाऊंड वॉलचे काम सुरू करणे अनिवार्य आहे.
महापौरांचे कडक आदेश
महापौर दीपमाला काळे यांनी शहर अभियंता आणि मक्तेदारांना स्पष्ट निर्देश दिले की, सुधारित वाढीव कामाचे नियोजन करा. मनपाने कचरा बाजूला केल्यावर मक्तेदाराने एका दिवसाचाही विलंब न लावता कामाला सुरुवात करावी. रॅम्पच्या कामात स्थानिक नागरिकांकडून विरोध होत असल्यास, प्रशासनाने पोलीस बंदोबस्तात काम पूर्ण करून घ्यावे, अशा सूचनाही यावेळी देण्यात आल्या.
या बैठकीस उपमहापौर मनोज चौधरी, स्थायी समिती सभापती डॉ. चंद्रशेखर पाटील, आयुक्त ज्ञानेश्वर ढेरे, सहाय्यक आयुक्त उदय पाटील, शहर अभियंता योगेश बोरोले यांच्यासह अन्य अधिकारी उपस्थित होते.
