दोन जणांविरुद्ध पाचोरा पोलिसांत गुन्हे दाखल
पाचोरा (प्रतिनिधी) :- कर्ज थकबाकीमुळे जळगाव जनता सहकारी बँकेने कायदेशीर प्रक्रिया पूर्ण करून सील केलेली घर आणि दुकानाचे कुलूप बेकायदेशीरपणे तोडून आत प्रवेश केल्याप्रकरणी पाचोरा पोलीस ठाण्यात दोन वेगवेगळ्या गुन्ह्यांची नोंद करण्यात आली आहे. याप्रकरणी बँकेचे अधिकृत अधिकारी शशिकांत शांताराम बोरसे यांनी फिर्याद दिली असून, सिंधी कॉलनी परिसरातील या घटनांमुळे शहरात खळबळ उडाली आहे.
प्रकरण १: सील केलेल्या घरात बेकायदेशीर प्रवेश
पहिल्या घटनेत, आरोपी राम किसनचंद नागरानी (रा. सिंधी कॉलनी, पाचोरा) यांनी बँकेकडून १० लाख रुपयांचे ‘सीसी कर्ज’ घेतले होते. सन २०२३ पासून कर्जाचे नूतनीकरण न केल्याने आणि थकबाकी न भरल्याने बँकेने ‘सरफेसी’ कायद्यांतर्गत जिल्हाधिकाऱ्यांच्या आदेशाने सदर घर कायदेशीररीत्या सील केले होते. मात्र, ३ ते ६ फेब्रुवारी २०२६ च्या दरम्यान आरोपीने बँकेचे अधिकृत सील तोडून घरात बेकायदेशीर प्रवेश केला आणि तिथे राहू लागला.
प्रकरण २: दुकानाचे सील तोडून ताबा घेण्याचा प्रयत्न
दुसऱ्या घटनेत, आरोपी हरीश उर्फ हरेश किसनचंद नागरानी (रा. सिंधी कॉलनी, पाचोरा) यांनी देखील बँकेच्या थकबाकीपोटी सील केलेले दुकान (सीटीएस नं. ३३७१/१, दुकान क्र. ४, मानसिंहका कॉर्नर परिसर) बेकायदेशीरपणे उघडले. नायब तहसीलदारांच्या उपस्थितीत बँकेने या दुकानाचा ताबा घेतला होता. मात्र, आरोपीने प्रशासकीय आदेशांचे उल्लंघन करत दुकानाचे सील तोडून आत प्रवेश केला.
या दोन्ही प्रकरणांत बँकेचे वसुली विभाग प्रमुख शशिकांत बोरसे यांनी दिलेल्या तक्रारीवरून पाचोरा पोलिसांनी गुन्हे दाखल केले आहेत. पोलीस निरीक्षक राहुलकुमार पवार यांच्या मार्गदर्शनाखाली पोलीस हवालीदार श्रीकांत गायकवाड आणि राहुल शिंपी पुढील तपास करत आहेत.0प्रशासनाने जप्त केलेली मालमत्ता अशा प्रकारे परस्पर ताब्यात घेणे हा गंभीर गुन्हा मानला जात असून, पोलीस आता यावर काय कठोर पावले उचलतात याकडे सर्वांचे लक्ष लागले आहे.
