भुसावळ शहरातील आनंदनगर परिसरातील घटना
भुसावळ ( प्रतिनिधी ) – शहरातील आनंदनगर परिसरात गुरुवारी रात्री सुमारे पावणेनऊच्या सुमारास इन्व्हर्टर बॅटरीचा अचानक स्फोट होऊन घरात आग लागली. या आगीत घरातील गादी, चादरी व इतर साहित्य जळून नुकसान झाले. मात्र, सुदैवाने कोणतीही जीवितहानी झाली नाही. वेळीच आगीवर नियंत्रण मिळवल्याने मोठा अनर्थ टळला.
पुरुषोत्तम गाजरे यांच्या घरी हे घटना घडली. बॅटरीचा स्फोट होताच आगीने रौद्ररूप धारण केले. परिस्थिती गंभीर होण्याआधीच नागरिकांनी तत्काळ धाव घेत अग्निरोधक सिलिंडरच्या साहाय्याने आग आटोक्यात आणली. काही वेळातच भुसावळ नगरपालिकेच्या अग्निशमन दलाचा बंब घटनास्थळी दाखल झाला आणि संपूर्ण आग विझविण्यात आली.
बॅटरीचा स्फोट होताच आग पसरली मात्र परिसरातील नागरिकांनी धाव घेत आगीवर नियंत्रण मिळवले. स्फोटामुळे परिसरात घबराट आणि भीतीचे वातावरण निर्माण झाले होते. नागरिकांनी मोठ्या प्रमाणावर घटनास्थळी गर्दी केली होती. मात्र, स्थानिक नागरिकांच्या प्रसंगावधानामुळे आणि अग्निशमन पथकाच्या तत्परतेमुळे मोठी हानी टळली.
