हैदराबाद- हैदराबादमध्ये काल झालेल्या मुसळधार पावसामुळे सर्वत्र हाहाकार माजलाय. गेल्या 24 तासात 20 सेंटीमीटरपेक्षा जास्त पाऊस पडल्याने संपूर्ण शहरात पाणी साचलंय. अनेक गाड्या या पाण्यात वाहून गेल्या आहेत. हवामान खात्याने आजही मुसळधार पावसाचा अंदाज वर्तवला आहे. पावसाच्या विविध घटनांमध्ये आतापर्यंत एकूण 14 लोकांचा मृत्यू झाल्याचे वृत्त आहे. शहराच्या चंद्रायनगुट्टा या भागात पावसामुळे काही घरांच्या भिंती कोसळल्याने तीन लहान मुलांसह 9 लोकांचा मृत्यू झाला असून 2 लोक जखमी झाले आहेत. या परिसरात बचावाचे कार्य मोठ्या प्रमाणावर सुरू आहे.
प्रशासनाने लोकांना त्यांच्या घरी राहण्याचे आवाहन केले आहे. यासंबंधी तेलंगना राज्याचे मुख्यमंत्री चंद्रशेखर राव उच्चस्तरीय बैठक घेत आहेत. त्यांनी राज्याचे मुख्य सचिव सोमेश कुमार यांना राज्यात पुढच्या दोन दिवसासांठी हाय अलर्ट जाहीर करण्याचे आणि बचाव कार्य युध्दपातळीवर सरू करण्याचे आदेश दिले आहेत.
चंद्रायनगुट्टा भागात ही घटना घडली तेंव्हा AIMIM चे खासदार असाउद्दीन ओवेसी त्या ठिकाणी पोहचले. स्थानिक लोकही या मदत कार्यात भाग घेत आहेत. यानंतर नुकसानीचा अंदाज घेतला जाईल.
हैदराबादमध्ये सर्वात जास्त पावसाची नोंद एलबी नगर परिसरात झाली आहे. गेल्या 24 तासात तिथे 25 सेमी इतका पाऊस झाला आहे. काल संध्याकाळी 6 वाजल्यानंतर पावसाचे प्रमाण वाढले आणि ते रात्रभर कायम होते. मुख्यमंत्र्यानी या घटनेवर प्रशासनाकडून अहवाल मागवला आहे. SDRF ची टीम सर्व शहरभर बचाव कार्य करण्यात गुंतली आहे.
शहराच्या मध्यभागी असणाऱा हुसेन सागर तलाव जो याआधी अर्धा भरला होता, या पावसानंतर तो पूर्ण भरून त्याचे पाणी सर्वत्र रस्त्यावर पसरत होते. हैदराबाद महानगरपालिकेचे आयुक्त लोकेश कुमार यांनी शहरातील नागरिकांना घरातून बाहेर न पडण्याचे आवाहन केले आहे.
पाच राज्यांत हवामान विभागाने दिला हाय अलर्ट
बंगालच्या उपसागरात निर्माण झालेल्या कमी दाबाच्या पट्ट्यामुळे तेलंगना राज्यात इतक्या मोठ्या प्रमाणात पावसाची नोंद झाली. बंगालच्या उपसागरातील निर्माण झालेल्या परिस्थितीमुळे पावसाचा हा पट्टा तेलंगनाकडून महाराष्ट्राकडे सरकण्याची शक्यता आहे. त्यामुळे हैदराबाद शहरासोबतच तेलंगनाच्या इतर भागातही पावसाची शक्यता आहे.
हवामान विभागाने मुसळधार पावसासोबतच वीजांपासूनही सावध राहण्याचे नागरिकांना आवाहन केले आहे. महाराष्ट्रातही आज कडक वीजांसह मुसळधार पावसाची शक्यता असल्याचा अंदाज हवामान खात्याने वर्तवला आहे. राज्यात मुंबई, रायगड, रत्नागिरी आणि पालघरसह संपूर्ण कोकण प्रदेशात मुसळधार पावसाचा अंदाज व्यक्त केला आहे.
महाराष्ट्रासहित कर्नाटक राज्याच्या किनारपट्टी प्रदेशात मुसळधार पावसाचा अंदाज आहे. त्यामुळे या प्रदेशातील नागरिकांना काळजी घेण्याचे आवाहन करण्यात आले आहे. तसेच आंध्र प्रदेशच्या काही भागातील नागरिकांनाही काळजी घेण्याचे आवाहन केले गेले आहे.
हवामान खात्याने महाराष्ट्र, कर्नाटक आणि गोवा मध्ये रेड अलर्ट जाहीर केला आहे.
