महिला बालकल्याण अधिकाऱ्यांच्या मृत्यूने खळबळ, पती जि.प.चे अधिकारी ,जळगाव शहरात दुपारी घडली घटना
जळगाव (प्रतिनिधी) : येथील जिल्हा परिषदेत जिल्हा कार्यक्रम अधिकारी असलेले देवेंद्र राऊत यांच्या पत्नी तथा जिल्हा महिला बालकल्याण विभागात अधिकारी असलेल्या मयुरी करपे राऊत यांचा हृदयविकाराने मृत्यू झाल्याची हृदयद्रावक घटना शनिवारी दि. १४ सप्टेंबर रोजी ४ वाजेच्या सुमारास दुपारी घडली आहे. याप्रकरणी त्यांच्या कॉलनीतील नागरिकांसह अधिकारी वर्गाने जिल्हा रुग्णालयात धाव घेतली होती.
मयुरी देवेंद्र राऊत-करपे (वय ३२, रा. श्रीराम नगर, दादावाडी परिसर,जळगाव) असे मयत महिला अधिकाऱ्यांचे नाव आहे. त्या पती देवेंद्र राऊत व २ मुलींसह राहत होत्या.देवेंद्र राऊत हे जिल्हा परिषदेत महिला बालकल्याण विभाग येथे जिल्हा कार्यक्रम अधिकारी म्हणून कार्यरत असून मयुरी करपे या आकाशवाणी चौकातील जिल्हा महिला बालकल्याण विभागात कार्यरत आहेत. शनिवारी दि. १४ सप्टेंबर रोजी मयुरी करपे यांनी दुपारी पती देंवेंद्र यांना एका खाजगी रुग्णालयात बीपीचा त्रास होत असल्याने दाखविण्यासाठी आणले होते.
त्यावेळी अचानक मयुरी करपे यांना प्रकृती खराब झाल्याने त्या कोसळल्या. त्यानंतर नातेवाईकांनी दोघं पतिपत्नीला दुसऱ्या खाजगी रुग्णालयात तातडीने हलविले. त्याठिकाणी देवेंद्र राऊत यांच्यावर उपचार सुरु आहे. तर मयुरी करपे राऊत यांचा हृदयविकाराने मृत्यू झाला. यावेळी नातेवाईकांना अश्रू अनावर झाले होते. शवविच्छेदनकामी मृतदेह शासकीय वैद्यकीय महाविद्यालयात दाखल करण्यात आला आहे. श्रीराम नगरात माहिती मिळताच त्यांच्यासह सरकारी अधिकाऱ्यांनी तातडीने शासकीय वैद्यकीय महाविद्यालय व रुग्णालयात धाव घेतली होती. दरम्यान, राऊत यांचा परिवार अत्यंत हसता खेळता परिवार होता. त्यांच्या परिवारात दुःखाचा डोंगर कोसळल्याने अनेकांनी आक्रोश केला.
