तरुण कुढापा मंडळातर्फे श्री शिव महापुराण कथेला प्रारंभ
जळगाव (प्रतिनिधी) :- जीवनात चैतन्य मिळावे, आध्यात्मिक विकास व्हावा, मानसिक दुर्बलता नष्ट होऊन जीवन सुकर करीत आत्मिक बळ मिळावे यासाठी सातत्याने भक्ती करीत रहा असे मार्गदर्शन हभप देवदत्त महाराज मोरदे यांनी केले.
जळगाव शहरातील तरुण कुढापा मंडळातर्फे दरवर्षीप्रमाणे धार्मिक उपक्रमाचे आयोजन करण्यात येते. यावर्षी संगीतमय श्री शिवमहापुराण कथेचे आयोजन करण्यात आले आहे. सोमवारी २५ डिसेंबर रोजी भाविकांच्या उत्साहात श्री शिव महापुराण कथेला प्रारंभ झाला. ही कथा ३१ डिसेंबरपर्यंत असून १ जानेवारी रोजी सकाळी गोपाळकाल्याचे किर्तन होऊन समारोप होणार आहे. कथा दुपारी १ वाजेपासून हभप देवदत्त महाराज मोरदे हे सांगत आहेत.
सोमवारी सकाळी ५ जोडप्यांच्या हस्ते पूजन करण्यात आले. यावेळी विविध मंत्रोच्चारात ब्रह्मवृंदांनी पूजा संपन्न केली. दुपारी १ ते ५ यावेळेत श्रवणीय संगीतमय श्री शिवमहापुराण कथेला ह.भ.प. देवदत्त महाराज मोरदे यांनी सुरुवात केली. देवदत्त महाराज यांनी पहिल्या दिवशी कथा महात्म्य वर्णन करीत शिव महापुराण कथा ही जनकल्याणकारी व भाविकांना मन:शांतीच्या मार्गावर नेणारी असल्याचे सांगितले.
याप्रसंगी तरुण कुढापा चौकातील आणि जुने जळगाव परिसरातील भाविकांनी मोठ्या संख्येने उपस्थिती दिली आहे.
