जळगावातील शिवाजी नगरातील घटना
जळगाव (प्रतिनिधी) – दोन लहान मुलांच्या भांडणातून काही व्यक्तींमध्ये हाणामारी झाल्याची घटना सोमवारी १७ जुलै रोजी शहरातील शिवाजी नगर परिसरात घडली आहे. त्यानंतर एका रेकॉर्डवरील गुन्हेगाराने हवेत गोळीबार केल्याची खळबळजनक घटना दुपारी उघडकीस आली आहे.
घटनेची माहिती मिळताच शहर पोलीस स्टेशनचे कर्मचारी घटनास्थळी पोहोचले. पोलिसांनी गोळीबार करणाऱ्या दीपक बागुल याला अटक केली आहे. तर मारहाण करणाऱ्या दोन्ही अल्पवयीन आरोपींना देखील चौकशीसाठी ताब्यात घेण्यात आलंय. दीपक बागुल असं गोळीबार करणाऱ्या संशयित आरोपीचं नाव आहे. तो रेकॉर्डवरील गुन्हेगार असून, यापूर्वी त्याच्यावर गंभीर गुन्हे दाखल असल्याची माहिती पोलिसांनी दिली.
गुटख्याची पुडी मागितल्याचा कारणावरून दोन अल्पवयीन मुलांमध्ये भांडण झालं. याच भांडणाचं पर्यवसान पुढं मोठ्यांच्या भानगडीत झालं आणि त्यात दीपक याने गोळीबार केल्याचं पोलिसांच्या प्राथमिक चौकशीत समोर आलंय. या प्रकरणी शहर पोलीस ठाण्यात गुन्हा दाखल करण्याचं काम सुरू आहे.
