पाचोरा तालुक्यातील माहेजी येथील घटना
पाचोरा (प्रतिनिधी) :- तालुक्यातील माहेजी गावाजवळील गिरणा नदी पात्रात डोहात पाय घसरून पडल्याने तरुणाचा दुर्दैवी मृत्यू झाल्याची हृदयद्रावक घटना घडली आहे. या प्रकरणी पाचोरा पोलिस ठाण्यात अकस्मात मृत्यूची नोंद करण्यात आली आहे.
आकाश राजेश यादव (वय २५) असे मयत तरुणाचे नाव आहे. त्याच्या पश्चात वृद्ध आई-वडील आणि एक भाऊ असा परिवार आहे. पशुपालन करून तो परिवाराचा उदरनिर्वाह करीत होता.(केसीएन)आकाश यादव हा गुरुवारी दुपारी २ वाजेच्या सुमारास माहेजी गावाजवळील गिरणा नदी पात्रात म्हशींना पाणी पाजण्यासाठी गेला होता. यावेळी अचानक त्याचा पाय घसरून तो थेट नदीतील खोल डोहात पडला. आकाशला पोहता न येत असल्याने त्याचा पाण्यात बुडून मृत्यू झाला. सायंकाळ झाली तरी आकाश घरी परतला नसल्याने त्याच्या भावाने शोध घेण्यास सुरुवात केली. यावेळी त्याचा मृतदेह नदीतील डोहात आढळून आला.
लगेचच त्याला पाचोरा ग्रामीण रुग्णालयात नेण्यात आले, मात्र वैद्यकीय अधिकाऱ्यांनी त्याला तपासून मृत घोषित केले. यावेळी त्याच्या कुटुंबाने शोक व्यक्त केला. आकाश यादव हा अत्यंत मेहनती, शांत स्वभावाचा तरुण होता. त्याच्या मृत्यूमुळे माहेजी गावावर शोककळा पसरली आहे. घटनेप्रकरणी पाचोरा पोलीस ठाण्यात अकस्मात मृत्यूची नोंद करण्यात आली आहे.
