जळगावात एका घरफोडीचा प्रयत्न
जळगाव (प्रतिनिधी) : चोरट्यांनी शहरातील भोईटेनगर येथे गौरी प्राईड अपार्टमेंटमधील एका शिक्षकाचे घर फोडून ३ लाख २० हजार रुपयांचा ऐवज लंपास केल्याची घटना सोमवारी सकाळी ८ वाजता उघडकीस आली आहे. या प्रकरणी शहर पोलिस ठाण्यात अज्ञात चोरट्यांविरुध्द गुन्हा दाखल करण्यात आला आहे.
मयूर बाळासाहेब देशमुख ( वय ३६, रा.गौरी प्राईड अपार्टमेंट, भोईटेनगर) हे शिक्षक असून, ते पत्नी व दोन मुलांसोबत भोईटेनगरात वास्तव्यास आहेत. शनिवारी परिवारासह अडावद येथे उत्तरकार्यासाठी गेले होते. ते सोमवारी परत येणार होते. दरम्यान, चोरट्यांनी बंद घर असल्याचा फायदा घेत, रविवारी रात्री घराच्या दरवाज्याचा कडीकोयंडा तोडून घरात प्रवेश केला. घरातून १ लाख ४० हजार रुपये किंमतेचे ४० ग्रॅम वजनाचे सोन्याचे मंगळसुत्र, ७० हजार रुपये किंमतीच्या सोन्याच्या बांगळ्या, ७० हजार रुपये रोख रक्कम, १४ हजार रुपये किंमतीचा सोन्याचा तुकडा, तर काही चांदीचे दागिणे मिळून ३ लाख २० हजार रुपये किंमतीचा ऐवज चोरट्यांनी चोरुन नेला.
सोमवारी सकाळी मयूर देशमुख यांच्या शेजाऱ्यांना देशमुख यांच्या घराच्या दरवाज्यावरील कडी-कोयंडा पडलेला दिसला. लागलीच शेजारच्यांनी मयूर देशमुख यांना फोन करुन, त्यांच्या घरी चोरी झाल्याची माहिती दिली. काही वेळानंतर देशमुख परिवार घरी पोहचल्यानंतर, त्यांनी शहर पोलिसांना याबाबतची माहिती दिली. या प्रकरणी मयूर देशमुख यांच्या फिर्यादीवरुन अज्ञात चोरट्यांविरुद्ध गुन्हा दाखल करण्यात आला आहे. पुढील तपास रामचंद्र शिखरे हे करत आहेत.
शहरातील दूध फेडरेशन परिसरात महावीर नगर भागातही संगिता महेश ओझा यांचे घर फोडण्याचा प्रयत्न रविवारी झाला. संगिता ओझा या घरी नसताना, रविवारी पहाटे चार अज्ञात चोरटे घरात शिरले. सुदैवाने चोरट्यांना घरात काहीच आढळून न आल्याने ते परतले. संगिता ओझा सोमवारी घरी परतल्यानंतर, त्यांच्या घरातील सामान अत्यावस्थ पडलेले दिसून आले. त्यांनी या प्रकरणी शहर पोलिस ठाण्यात अज्ञात चोरट्यांविरुद्ध फिर्याद दिली असून, त्यांच्या फिर्यादीवरुन गुन्हा दाखल करण्यात आला आहे.
