जळगावातील पिंप्राळा येथील घटना
जळगाव (प्रतिनिधी) : शहरात रामानंदनगर हद्दीत शनिवार दिनांक १० रोजी एका रात्रीत तीन बंद दुकाने चोरट्यांनी फोडली. गल्ल्यातून नाणी, चलनातील नोटा असा सुमारे ९ हजार रुपयांचा मुद्देमाल चोरून नेला. या प्रकाराने परिसरात नागरिकांमध्ये दहशत निर्माण झाली असून रामानंदनगर पोलीस स्टेशनला गुन्हा दाखल करण्यात आला आहे.
अकबर अजमल खान (वय ३७. रा. ख्वाजानगर पिंप्राळा हुडको) हे कुटुंबासह राहतात. राहत्या घरात त्यांचे किराणा दुकान आहे. नेहमीप्रमाणे त्यांनी शनिवारी रात्री दुकान बंद केले. मध्यरात्रीनंतर चोरट्यांनी या दुकानाचा कडी कोयंडा तोडून आतमध्ये प्रवेश केला. गल्ल्यात ठेवलेले नाणे, दहा, वीस व पन्नास रुपये किमतीच्या नोटा असा एकुण पाच हजाराचा मुद्देमाल घेऊन चोरटे पसार झाले. रविवार, ११ रोजी अकबर खान हे दुकान उघडण्यासाठी आले असता चोरी झाल्याचे उघड झाले.
दुसऱ्या घटनेत, अतुल दिनकर बारी (वय ३८.रा. दांडेकरनगर) यांच्या मालकीची पिंप्राळा हुडको याठिकाणी हर्षल दूध डेअरी आहे. शनिवारी रात्री चोरट्यांनी या डेअरीचा कडीकोयंडा तोडत दुकानामध्ये प्रवेश केला. गल्ल्यात ठेवलेल्या १०,२०,५० आणि १०० रुपयांच्या सुमारे दोन हजार मुल्यांच्या नोटा घेऊन चोरटे पसार झाले. रविवारी पहाटे अतुल बारी डेअरी उघडण्यासाठी आले असता त्यांना कडीकोयंडा तुटलेला दिसला त्यानंतर चोरीचा प्रकार उघडकीस आला. तक्रारीनुसार रामानंदनगर पोलीस ठाण्यात दाखल गुन्ह्याचा तपास सहायक फौजदार संजय सपकाळे हे करीत आहेत.
पिंप्राळा हुङको येथील किराणा दुकानाचा कडीकोयंडा तोडून चोरट्यांनी मुद्देमाल चोरून नेला आहे. असलम शेख साबीर शेख (वय २४, रा. पिंप्राळा हुडको) या ठिकाणी कुटुंबासह वास्तव्यास आहेत. त्यांचे किराणा दुकान आहे. रात्री चोरट्यांनी कडीकोयंडा तोडून या दुकानात प्रवेश केला. मुद्देमालाचा शोध घेत गल्ल्यामधून २ हजार किमतीचे नाणे चोरुन नेले. रविवारी सकाळी ही घटना समोर आली. रामानंदनगर पोलीस ठाण्यात दाखल गुन्ह्याचा तपास पोलीस हेड कॉन्सटेबल जितेंद्र राठोड हे करीत आहेत. घटनास्थळी पोलीस निरीक्षक राजेंद्र गुंजाळ तसेच पोलिसांनी जावून पाहणी केली. परिसरात सीसीटीव्हीचाही शोध घेतला.
या प्रकरणी तक्रारीनुसार रामानंदनगर पोलीस ठाण्यात गुन्हा दाखल झाला. तपास पोलीस हेड कॉन्सटेबल जितेंद्र राजपूत हे करीत आहेत.
