अमळनेर;- येथे लॉक डाऊन व जमावबंदी असतांनाही भाजीपाला विक्रेत्यांनी गर्दी केल्याप्रकरणी ७ भाजीपाला विक्रेत्यांवर नगरपरिषदेने गुन्हा दाखल केला असून शेतकऱ्यांच्या व्यतिरिक्त व्यापारी जर किरकोळ विक्रेत्याना भाजीपाला विकताना आढळल्यास गुन्हे दाखल करण्यात येतील असा इशारा मुख्याधिकारी डॉ विद्या गायकवाड यांनी दिला आहे
सविस्तर माहिती अशी की, दि 11रोजी सकाळी मुख्याधिकारी विद्या गायकवाड ,संजय चौधरी , सोमचंद संदानशिव, व अतिक्रमण विभागाच्या कर्मचाऱ्यांच्या पथकाने शहरात गस्त घातली असता पैलाड भागात हेडावे नाक्यावर काही भाजीपाला व्यापारी व विक्रेत्यांनी गर्दी केली होती. कोरोनाचा संसर्ग होऊ नये म्हणून शासनाने जमावबंदी लागू केली आहे, मात्र राहुल भगवान महाजन, अनिल महाजन , गुलाब भगवान महाजन , मंगेश अशोक महाजन , गणेश वासुदेव महाजन, विशाल महाजन ,संतोष रामचंद्र चौधरी सर्व रा माळीवाडा यांच्याविरुद्ध अतिक्रमण विभाग प्रमुख राधेश्याम अग्रवाल यांनी अमळनेर पोलिसात भादवी कलम 188 प्रमाणे गुन्हा दाखल करण्यात आला असून तपास हेडकॉन्स्टेबल पुरुषोत्तम पाटील करीत आहेत
दरम्यान कोरोनाच्या भीतीने लिलावाची ठिकाणे तीनवेळा बदलली असून शेतकऱ्यांना सरळ त्यांचा भाजीपाला किरकोळ विक्रेते व ग्राहकांना विकण्याची मुभा दिली होती मात्र अचानक दिलेल्या भेटीत व्यापारीच आढळून आले त्यामुळे यापुढे व्यापारी भाजीपाला विक्री करताना आढळून आल्यास त्यांच्यावर गुन्हे दाखल करण्यात येतील असा इशारा मुख्याधिकारी डॉ विद्या गायकवाड यांनी दिला आहे.
