जिल्हा पेठ पोलीस स्टेशनची कामगिरी, ८ पिस्टलसह ७ जणांना अटक
जळगाव (प्रतिनिधी):- शहरात अवैध अग्नीशस्त्रे बाळगणाऱ्या आणि त्यांची विक्री करणाऱ्या गुन्हेगारांविरुद्ध जिल्हापेठ पोलिसांनी धडक कारवाई केली आहे. एका गुप्त बातमीदाराकडून मिळालेल्या माहितीच्या आधारे पोलिसांनी ही साखळी उघडकीस आणली असून, यात आंतरराज्य कनेक्शन देखील समोर आले आहे.
१ मार्च २०२६ रोजी प्रभारी अधिकारी अनिल वाघ यांना माहिती मिळाली की, यश नन्नवरे नावाचा तरुण इंडिया गॅरेज परिसरात पिस्टल बाळगून आहे. पोलिसांनी त्याला ताब्यात घेऊन झडती घेतली असता एक गावठी पिस्टल सापडले. त्याच्या सखोल चौकशीतून या मोठ्या रॅकेटचा खुलासा झाला.तपासादरम्यान पोलिसांनी एकापाठोपाठ एक अशा ७ आरोपींना बेड्या ठोकल्या आहेत.
संशयित आरोपींची नावे व जप्त मुद्देमाल
यश रामदास नन्नवरे (वय २७, जळगाव): १ पिस्टल.
केशव सुनील भालेराव (वय २३, वरणगाव): १ पिस्टल.
गौरव देविदास साळवे (वय २२, पिंप्राळा): १ पिस्टल, ३ जिवंत काडतुस आणि होंडा युनिकॉर्न मोटारसायकल.
समाधान बळीराम निकम (वय ४०, अंजाळा, यावल): हा मुख्य विक्रेता असून तो मध्यप्रदेशातून शस्त्रे आणून विकत असे.
विकास प्रकाश काकडे (वय २८, साळसिंगी): २ पिस्टल, २ जिवंत काडतुस.
जगदीश गजानन महाजन (वय २०, शहापूर, मध्यप्रदेश): २ गावठी पिस्टल.
कैलास राजेंद्र माळी (वय २०, बोरकुंड, धुळे): १ गावठी पिस्टल, ५ जिवंत काडतुस.
गुन्हेगारी पार्श्वभूमी
अटक करण्यात आलेल्या आरोपींपैकी ३ आरोपी हे रेकॉर्डवरील गुन्हेगार आहेत. मुख्य विक्रेता समाधान निकम हा पाचोरा पोलीस स्टेशनमधील खुनाचा प्रयत्न आणि यावल पोलीस स्टेशनमधील आर्म ॲक्टच्या गुन्ह्यात ‘पाहिजे’ असलेला आरोपी होता. तसेच केशव भालेराव हा देखील वरणगाव पोलीस स्टेशनमधील विविध गुन्ह्यांत फरार होता. ही कामगिरी पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, आणि उपविभागीय पोलीस अधिकारी नितीन गणापुरे यांच्या मार्गदर्शनाखाली सहाय्यक पोलीस निरीक्षक अनिल वाघ, पोलीस उपनिरीक्षक गोपाल देशमुख आणि त्यांच्या पथकाने फत्ते केली. या गुन्ह्याचा पुढील तपास पोलीस उपनिरीक्षक गोपाल देशमुख करत आहेत.
