जळगावात शनिपेठ पोलिसांची धडक कारवाई
जळगाव (प्रतिनिधी) : शनिपेठ पोलीस ठाणे हद्दीत अवैध गावठी कट्टा व जिवंत काडतुसे विक्रीसाठी आणल्याच्या माहितीवरून पोलिसांनी धडक कारवाई करत दोन संशयित आरोपींना अटक केली आहे. या कारवाईत एक गावठी पिस्तूल व चार जिवंत काडतुसे हस्तगत करण्यात आली आहेत. संबंधित आरोपींविरोधात गुन्हा दाखल करण्यात आला आहे.
पोलीस निरीक्षक रंगनाथ धारबळे यांना दि. १५ एप्रिल रोजी सकाळी १२ वाजेच्या सुमारास गोपनीय माहिती मिळाली. राकेश दिलीप भावसार (वय ४१, रा. सदाशिवनगर, जळगाव) हा ज्ञानदेवनगर ते काशिनाथनगर रोडावर गावठी पिस्तूल घेऊन थांबला आहे. या माहितीवरून पोउपनिरीक्षक योगेश ढिकले आणि त्यांच्या टीमने घटनास्थळी धाव घेत छापा टाकला. तपासणीदरम्यान आरोपीच्या कमरेला बांधलेले गावठी कट्टा व चार जिवंत काडतुसे आढळून आले.(केसीएन)पोलिसांनी त्यास ताब्यात घेऊन चौकशी केली.
त्याने दि. ६ एप्रिल रोजी दुपारी संशयित प्रसाद संजय महाजन (वय २८, रा. ज्ञानदेवनगर, जळगाव) याच्याकडून ५४ हजार रुपये रोख रक्कम देऊन हे शस्त्र खरेदी केल्याचे कबूल केले.(केसीएन)त्यावरून पोलिसांनी महाजन यालाही अटक केली. या दोघांनी संगनमत करून अवैध शस्त्राची खरेदी-विक्री केल्याचे निष्पन्न झाल्याने शनिपेठ पोलीस ठाण्यात गुन्हा दाखल करण्यात आला आहे. ही कारवाई पो.नि. रंगनाथ धारबळे यांच्या मार्गदर्शनाखाली पोउपनिरीक्षक योगेश ढिकले, पोहेकॉ युवराज कोळी, रविंद्र बोदवडे, शशिकांत पाटील, अनिल कांबळे व पराग दुसाने यांनी केली. या प्रकरणाचा पुढील तपास सहा. पोलीस निरीक्षक साजीद मन्सुरी करीत आहेत.
