पुणे जिल्ह्यातील घटना
पुणे (प्रतिनिधी) – खेड तालुक्यातील खरपुडी बुद्रुक येथे घरातच शॉर्ट सर्किट झाल्याने झोपेतच तरुणाचा मृत्यू झाला असल्याची माहिती समोर आली आहे. त्याने घरात श्री गणेशासमोर आकर्षक सजावट करत लाईटच्या माळा लावल्या होत्या. याबाबत खेड पोलिस ठाण्यात आकस्मित मृत्यूची नोंद करण्यात आली आहे.
वैभव जगन्नाथ गरुड ( वय ३५) जळून मृत्यू झालेल्या तरुणाचं नाव आहे. खेड तालुक्यातील खरापुडी बुद्रुक येथील दत्तनगर येथे वैभव गरुड हे त्यांच्या कुटुंबासमवेत राहतात. गरुड यांनी त्यांच्या घरातील गणपतीसमोर आकर्षक सजावट करत लाईटच्या माळा लावल्या होत्या. मात्र, मध्यारात्री घरात शॉर्ट सर्किट झाले आणि घरात आग लागली. त्यामुळे घरातील सर्व साहित्य त्यात साड्या, बेड आणि इतर वस्तू जळून खाक झाल्या.
मात्र, या आगीत गादीवर झोपलेले वैभव यांचा जागेवरच जळून मृत्यू झाला. त्यामुळे कुटुंबावर शोककळा पसरली आहे. वैभव हा परिसरात सर्पमित्र म्हणून परिचित होता. त्याच्या पश्चात पत्नी व दोन लहान मुली असा परिवार आहेत. या घटनेने हळहळ व्यक्त होत आहे. याबाबत खेड पोलिस ठाण्यात आकस्मित मृत्यूची नोंद करण्यात आली आहे.
