जळगाव एलसीबी, पहूर पोलिसांची मोठी कारवाई
जळगाव ( प्रतिनिधी ) – अमली पदार्थ तस्करी विरोधात जळगाव पोलिसांनी मोठी मोहीम उघडली असून, स्थानिक गुन्हे शाखा आणि पहूर पोलीस ठाण्याच्या पथकाने संयुक्त कारवाई करत ६३ किलो ७१० ग्रॅम गांजा जप्त केला आहे. या कारवाईत दोन आलिशान कारसह एकूण २२ लाख ७४ हजार २०० रुपयांचा मुद्देमाल हस्तगत करण्यात आला असून सहा आरोपींना बेड्या ठोकण्यात आल्या आहेत.
स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना दि. २ मार्च रोजी गोपनीय माहिती मिळाली होती की, एका इनोव्हा कारमधून (क्रमांक एमएच-०४-डीजे-२०४२) जळगावकडून पहूरच्या दिशेने अमली पदार्थांची वाहतूक होत आहे. या माहितीच्या आधारे पोलिसांनी वाकोद गावाच्या पुढे सापळा रचून सदर कारचा पाठलाग केला आणि ती ताब्यात घेतली. झडती दरम्यान पोलिसांना कारमध्ये मोठ्या प्रमाणात गांजा मिळून आला. जप्त करण्यात आलेल्या मालामध्ये गांजा: ६३ किलो ७१० ग्रॅम, किंमत १२,७४,२०० रुपये चां आहे.
या प्रकरणात मुंबई आणि धुळे येथील एकूण ६ जणांना अटक करण्यात आली आहे. सागर संजय इंगवले (रा. विचुंबे गाव, नवी मुंबई), इरफान अकरम शेख (रा. गोरेगाव, मुंबई), अमन ताज खान (रा. वर्सोवा, मुंबई), नईम शेख याकुब (रा. माणिकनगर, धुळे), आबीद खान मेहमुद खान (रा. जाममोहल्ला, धुळे), तोहसिफ खान रसूल खान (रा. १०० फुटी रोड, धुळे) असे त्यांचे नाव आहे. तपासात असे समोर आले आहे की, धुळे येथील आरोपींनी हा गांजा खामगाव (अकोला) येथून खरेदी केला होता आणि तो विक्रीसाठी नेला जात होता.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर आणि उपविभागीय पोलीस अधिकारी बापू रोहम यांच्या मार्गदर्शनाखाली पार पडली. स्थानिक गुन्हे शाखेचे वरिष्ठ पोलीस निरीक्षक राहुल गायकवाड, सपोनि प्रमोद कठोरे, फौजदार शरद बागल, अतुल वंजारी, अक्रम शेख, विजय पाटील नितीन बाविस्कर, किशोर पाटील, रवींद्र कापडणे, राहुल रगडे, अजय पाटील, ज्ञानेश्वर ठाकरे, दीपक पाटील, राहुल पाटील, संदीप धनगर, राहुल जोहरे विनोद पाटील आणि त्यांच्या पथकाने ही यशस्वी कामगिरी केली.
याप्रकरणी पहूर पोलीस ठाण्यात NDPS कायद्याच्या विविध कलमान्वये गुन्हा दाखल करण्यात आला असून, पुढील तपास पोलीस उपनिरीक्षक गणेश सुस्ते करत आहेत.
