पाचोरा (प्रतिनिधी ) – रक्षाबंधनासाठी माहेरी आलेल्या एका २० वर्षीय विवाहितेने गळफास घेऊन आत्महत्या केल्याची दुर्दैवी घटना तालुक्यातील शेवाळे येथे उघडकीस आली असून या घटनेमुळे खळबळ उडून हळहळ व्यक्त होत आहे. उमा नानू फादगे (वय -२०) असे विविवाहित महिलेचे नाव आहे.
शेवाळे ता. पाचोरा येथील नानू शिवदास फादगे यांची मुलगी उमा नानू फादगे हिचा विवाह खंडेराव नगर, जळगांव येथील रहिवाशी सनी प्रेमनाथ उमप यांच्याशी शेवाळे ता. पाचोरा येथे दि. १८ मे २०२२ रोजी झाला होता. रक्षाबंधन सणासाठी दोन्ही भावांना राखी बांधण्यासाठी यावे म्हणुन दि. १२ आॅगस्ट २०२२ रोजी उमा हिचे वडिल नानू फादगे हे उमाला माहेरी घेऊन आले होते.
दरम्यान घरातील स्वयंपाक घरात उमा ही दोरीच्या सहाय्याने फाशी घेतलेल्या अवस्थेत वडिलांना आढळुन येताच वडिल नानू फादगे यांनी ग्रामस्थांच्या मदतीने उमा हिस पाचोरा ग्रामीण रुग्णालयात दाखल केले असता वैद्यकीय अधिकारी डॉ. अमित साळुंखे यांनी उमा हिस मृत घोषित केले. उमा सनी उमप या विवाहितेने आत्महत्या का केली ? यांचे कारण मात्र अद्याप समजु शकले नाही.घटनेप्रकरणी पाचोरा पोलिसात अकस्मात मृत्यूची नोंद करण्यात आली असून पुढील तपास पोलिस काॅन्स्टेबल राकेश खोंडे हे करित आहे.
