एरंडोल नेरी रस्त्यावरील घटना ; चालकासह क्लिनर ताब्यात
जळगाव (प्रतिनिधी ) ;- बैलांसाठी पोळा सणोत्सव असल्याने साज घेण्यासाठी गेलेल्या तरुणाला भरधाव ट्रकने चिरडल्याचे दुर्दैवी घटना आज सकाळी साडे नऊ वाजेच्या सुमारास घडली असून घटनास्थळावरून ट्रकचालकासह क्लिनरला पोलिसांनी ताब्यात घेतले आहे. याप्रकरणी एमआयडीसी पोलीस स्टेशनला अपघाताची नोंद करण्याचे काम सुरु होते. पवन गोपाल सुर्यवंशी वय १६ रा. वसंतवाडी ता.जळगाव असे मयत झालेल्या मुलाचे नाव आहे.
याबाबत सूत्रांनी दिलेली माहिती अशी कि , एरंडोल-नेरी रस्त्यावर जळके येथून पवन गोपाल सूर्यवंशी वय १७ वर्षे व अलताफ बंन्डु तडवी वय १९ वर्षे हे मोटर सायकल क्रमांक MH 19BV7531ने वावडदा येथे पोळा सण असल्यामुळे बैलासाठी साज घेण्यासाठी गेला होता. परतीचा प्रवास करत असताना लहु पाटील यांच्या शेताजवळ सकाळी ९:३०वाजता नेरीकडुन समोरुन भरधाव वेगाने येणाऱ्या ट्रक क्रमांक HR 73-9316 याने उडवलं यात मोटारसायकलवर मागे बसलेला पवन गोपाल सूर्यवंशी या तरुणांच्या अंगावरुन ट्रक चे चाक गेल्यानं त्याचा जागीच मृत्यू झाला.
अपघातग्रस्त ट्रक अर्शिद सत्तार खान ( चालक) वय वर्षे ५० हा व त्याचा किन्नर शब्बीर हजरत खान वय २०वर्षे घटनास्थळावरून घेऊन एरंडोलच्या दिशेने पसार झाला.या घटनेची माहिती औद्योगिक वसाहत पोलीस स्टेशनला मिळाल्याने त्यांनी एरंडोल पोलिस स्टेशनशी संपर्क साधला व येथील कर्तव्यावर हजर असणारे पोलिस कर्मचारी कपिल पाटील, दत्ता ठाकरे व दिपक पाटील यांनी एरंडोल चौफुलीवर अपघात ग्रस्त ट्रक सह चालक व क्लिनर यांना ताब्यात घेतले.
यावेळी पोलीस कर्मचारी दिपक पाटील हे किरकोळ जखमी झाल्याची माहिती मिळते. एरंडोल या ठिकाणी जळगाव औद्योगिक वसाहत पोलिस स्टेशनचे पोलीस उपनिरीक्षक राजेंद्र उगले,पो.हे.कॉ.स्वप्नील पाटील याचे पथक पोहोचले व ट्रकसह आरोपींना ताब्यात घेऊन जळगाव येथे रवाना झाले.तसेच घटनास्थळी म्हसावद पोलिस स्टेशनचे पो.हे.कॉ. प्रदीप पाटील यांनी मयत तरुणाचा मृतदेह शवच्छेदनासाठी जळगाव जिल्हा शासकीय रुग्णालय येथे पाठविण्यात आला. तीन बहिणींचा एकुलता एक भाऊ गेल्याने आईवडीलांनी प्रचंड आक्रोश केला होता. याबाबत एमआयडीसी पोलीस ठाण्यात अकस्मात मृत्यूची नोंद करण्यात आली आहे. मयताच्या पश्चात आई रूपाला, वडील गोपाल त्र्यंबक सुर्यवंशी आणि तीन विवाहित बहिणी असा परिवार आहे. या घटनेमुळे वसंतवाडी गावात शोककळा पसरली आहे.
